Манай Монголын нөхцөлд ихэнх ажил хайгчид төрөл бүрийн компани, албан байгууллагад “наян” ажлын өргөдөл гаргах нь бий.  Ихэнхээс нь хариу авахгүй байх тохиолдол их бөгөөд ярилцлаганд урих гэдэг сугалаанд аз таарсантай адил зүйл болдог.  Хэрэв танд аз таарч нэгэнтээ л олон хүмүүс дундаас шилэгдэж сонгогдоод ярилцлаганд орохоор дуудагдсан бол хүмүүсийн нийтлэг гаргадаг доорх алдаануудыг гаргахгүй байхыг танд сануулж байна.

1.Ярилцлага авах хүний нэрийг мартах



Таныг ярилцлаганд орох гэж утсаар залгамагц тухайн албан байгууллага дээрээ очоод хэн гэдэг хүнтэй уулзах ёстой талаар лавлаж асуугаарай.  Энэ нь очоод хэн гэдэг хүнтэй уулзахаа мэдэхгүй хэн нэгнээс түмэн янзын асуулт асуухгүй танд амар байх болно.  Мартваа.

2.Цагаасаа хоцорч очих



Ярилцлаганд орох албан байгууллагынхаа байршлыг сайн мэдэхгүй байвал мэддэг хэн нэгнээс асуух юм уу, эсвэл Google ахаар байршлыг нь тогтоолгох хэрэгтэй.  Тэгээд аль болох эрт гарч, товлосон цагаас хэдэн минутын өмнө түрүүлж очих нь зүйтэй.

3.Асуултанд бүдрэх   



Зарим нэгэн тогтсон асуултуудад бэлтгээд очих нь их зүгээр байдаг.  Жишээ нь: Таны сул тал юу вэ?, Яагаад та энэ ажлыг сонирхож байна?, Таны хүсч буй цалингийн хэмжээ хэд вэ?, Таны ойрын 5 жилийн зорилго? гэх мэт хэцүү ч гэлээ тогтсон стандарт асуултуудад толгой гудайхгүйгээр хариулах чадвартай байх хэрэгтэй. 

4.Хуучин ажлаа дурьдахгүй байх



Ажилд авахыг зөвхөн ганц хүн шийдвэрлэчихдэггүй.  Багаараа ярилцаж байж эцсийн шийд гардаг тул та өмнө нь, эсвэл одоо ажиллаж байгаа албан байгууллагынхаа мэдээллийг тэдэнд үнэн зөвөөр гаргаж өгөх хэрэгтэй.  Энэ нь таныг хэр их туршлагатай хүн гэдгийг харуулах боломж учраас ажлын туршлагынхаа талаар харамгүй хуваалцах хэрэгтэй. 

5.Дуугүй дүмбийж суух



Ярилцлаганд уригдаж байсан хүн бүр л мэдэх байх.  Ярилцлагын төгсгөлд хүний нөөцийн мэргэжилтэн “За биднээс асуух асуулт байна уу? гэж лавладаг.  Энэ үед байхгүй гэж хариулах нь таныг үндсээр нь дуусгаж байгаатай адил.  Ямар ч асуултгүй байна гэдгийг тэд өөрсдийнх нь компанид ажиллах ямар ч бэлтгэл байхгүй, тухайн ажлын байрыг зүгээр л сонирхож ирсэн гэх сэтгэгдэлтэй үлддэг.