Боловсролын Зөвлөгөө Мэдээллийн Төв /БЗМТ ТББ/ нь дунд сургуулийн 10 болон 11-р ангид онц сайн дүнтэй суралцаж буй, англи хэлний өндөр мэдлэгтэй, гадаадын их дээд сургуулийн сургалтын төлбөрийг төлөх санхүүгийн боломжгүй өрхийн сурагчдыг АНУ-ын их дээд сургууль, коллежид тэтгэлгээр суралцуулах USAP хөтөлбөрт оролцохыг урьж байна. Хөтөлбөрийн зорилго: Сурлага сайтай, сурч боловсрох өндөр эрмэлзэлтэй, гадаадын их дээд сургуулийн сургалтын төлбөрийг төлөх санхүүгийн боломжгүй сурагчдыг АНУ-ын их дээд сургуульд тэтгэлэгтэйгээр элсүүлэн суралцуулж Монгол орны ирээдүйн өндөр мэдлэг, боловсрол, ур чадвар бүхий удирдагчдыг төрүүлэн бий болгоход оршино. Хөтөлбөрт оролцогчид 2013 оны 8-р сард АНУ-ын их дээд сургуульд элсэн тэтгэлгээр суралцахаар өргөдөл гаргах бөгөөд манай боловсролын зөвлөх ажилтнууд суралцах мэргэжлийн дагуу сургуулиа сонгох, АНУ-ын их дээд сургууль, коллежид элсэх өргөдлийн маягт бөглөх, ТОEFL, SAT элсэлтийн шалгалтанд бэлтгэх, тэтгэлэг хүсэх маягт бөглөх талаар сар бүр сургалт, зөвлөгөө өгч ажиллах бөгөөд сургуульдаа тэнцсэн сурагчдад оюутны виз хүсэх болон АНУ руу явахаас нь өмнө баримжаа олгох сургалт явуулна. Эдгээр бүх сургалт, зөвлөгөө нь үнэ төлбөргүй бөгөөд оролцогчид тус мэдээллийн төвийн Англи хэл дээрхи ном, товхимол бичгийг ашиглах боломжтой.