Өнгөрөгч оны аравдугаар сард тэрбумтан Илон Маск Твиттер платформыг худалдан авсан билээ. Тэгвэл даваа гарагт BBC сувгаас мэдээлснээр Илон Маск Твиттерийг худалдан авснаас хойш тус компани сурталчилгааны орлогынхоо тал орчим хувийг алдсан гэжээ. Энэ талаар Илон Маск өөрөө Твиттер хуудаснаа анхлан мэдэгдсэн байна.

Түүний тайлбарласнаар сурталчилгааны орлого буурч, өрийн хэмжээ нэмэгдэж байгаагаас үүдэн Твиттерийн мөнгөн урсгал сөрөг төлөвт байсаар байна гэжээ.

CNN сувгаас мэдээлснээр сурталчилгааны орлого нь тийн буурах болсонд Твиттерийн контентын хяналт, хязгаарлалтын журам хийгээд орон тооны цомхотгол, ойлгомжгүй хэтийн төлөв ихээр нөлөөлсөн гэсэн юм. Мөн түүнчлэн тоон мэдээллээс үзвэл өдгөө Твиттер платформ дээр сурталчилгаа явуулж буй газруудын 43 хувь нь л Илон Маск Твиттерийг худалдан авахаас өмнө тус платформыг сурталчилгааны нэг сувгаараа сонгож байсан газрууд гэжээ.

Тийнхүү үйл явдлын хүрээнд Илон Маскийн хэлснээр, “Бид ямар нэг байдлаар тансаглахаас урьдаар мөнгөн урсгалыг эерэг төлөвт оруулах хэрэгтэй байна” гэсэн байна.

Эх сурвалж: CNN, BBC