Twitter платформын эзэн, тэрбумтан Илон Маск тус компанийн хүрээнд ре-брэндинг ажлыг санаачлан хэрэгжүүлээд өдгөө хэдэн долоо хоногийн нүүрийг үзэж байгаа билээ. Улмаар ре-брэндинг ажлын хүрээнд тэд аль хэдийнээ компанийн нэрийг сольж, логог шинэчлэн төв оффисынхоо гадаа байршуулсан Twitter гэх нэрийг ч буулгасан юм.
Тэгвэл пүрэв гарагаас хэвлэлүүдийн мэдээлж байгаагаар Илон Маск хуучин брэндтэй холбоотой эд өлгийн зүйлсийг дуудлага худалдаанд оруулах болжээ.
BBC сувгаас мэдээлснээр Илон Маск дуудлага худалдаанд хуучин брэндтэй холбоотой нийт 584 эд өлгийг оруулах болсон гэнэ. Үүнд тус компанид ашиглагдаж байсан кофены ширээ, бэлгэ тэмдэг, интерьерийн зориулалттай үлэмж шувууны тор, Larry хэмээх цэнхэр шувууны биет лого, нэгэн цагт шуугиулж байсан уран зураг болон гэрэл зураг, хөгжмийн зэмсгүүд, сандал, ширээ зэрэг багтсан байна.
Дуудлага худалдааны хүрээнд нэг эд өлгийн эхлэх үнэ 25 ам.доллар байгаа гэнэ. Улмаар есдүгээр сарын 12-ы өдөр үнэ хаялцах үе шат эхлэх бөгөөд уг үе шат нь 48 цаг үргэлжлэх ажээ.
Эх сурвалж: BBC