АНУ-ын засгийн газар Умард Солонгос руу зорчих хоригоо дахин нэг жилээр сунгажээ.
Тодруулбал тусгай зөвшөөрөл аваагүй тохиолдолд Умард Солонгост АНУ-ын паспортоор зорчихыг хориглосон хугацааг ирэх оны наймдугаар сарын 31-ний өдрийг хүртэл сунгахаар болсон тухайгаа АНУ-ын Төрийн департамент мэдэгдлээ.
Төрийн департаментын зүгээс Умард Солонгост америкчуудыг хянаж цагдах, удаан хугацаагаар баривчлах зэрэг эрсдэлт нөхцөл байдал үргэлжилсээр байгаа тул ард иргэдийнхээ аюулгүй байдалд шууд учрах аюул заналхийллийг харгалзан ийнхүү шийдвэрлэсэн хэмээн тайлбарлав.
2017 оны зургадугаар сард Умард Солонгост саатуулагдсан Отто Уормбиер комд орсон байдалтай суллагдсанаасаа хойш ердөө долоо хоногийн дараа нас барсан ба үүний дараахан АНУ-ын засгийн газар тус улс руу зорчихыг хориглосон захирамж гаргаж байсан билээ. Ийнхүү энэ удаад Умард Солонгост зорчих хоригийг нэг жилээр сунгаж байгаа нь энэ юм.
Эх сурвалж: YTN