Тайланд улс Эдийн засгийн хамтын ажиллагаа, хөгжлийн байгууллагад (ЭЗХАХБ) элсэхээр зорьж байна.

Тайландын засгийн газар удахгүй ЭЗХАХБ-д элсэх хүсэлтээ гаргах гэж буй талаар тус улсын үндэсний эдийн засаг, нийгмийн хөгжлийн хорооны ерөнхий нарийн бичгийн дарга Дануча Пичаянан хэлснийг орон нутгийн хэвлэл мэдээллийн Nation агентлаг онцолжээ.

Тэрээр хэлэхдээ юуны өмнө ЭЗХАХБ-д элсэх хүсэлтэй байгаагаа илэрхийлсэн захидлыг удирдлагуудад нь өргөн барих ёстой бөгөөд үүнээс хойш 5-7 жилийн дотор эцэслэн шийдвэрлэгдэнэ хэмээн тайлбарласан байна.

Түүнчлэн Зүүн өмнөд Азийн орнууд дундаас Тайландаас гадна Индонез улс ЭЗХАХБ-д элсэх хүсэлтээ гаргахаар төлөвлөж байгаа аж.

Ерөнхий нарийн бичгийн дарга Дануча "АСЕАН-ы бусад орнуудтай харьцуулахад Тайланд, Индонези улсууд ЭЗХАХБ-д элсэхэд тун ойрхон ирээд байна. Гишүүн орон болсноор хөрөнгө оруулагчдын итгэл нэмэгдэж, илүү их хөрөнгө оруулалт татах болно" хэмээн цохон тэмдэглэв.

ЭЗХАХБ нь эдийн засгийн хөгжил, дэлхийн худалдааг дэмжих зорилготой 1961 онд байгуулагдсан олон улсын байгууллага бөгөөд одоогоор 38 гишүүн оронтой.

Хөгжиж буй орнууд гишүүн орнуудын зарим хэсгийг бүрдүүлдэг ч АНУ, Их Британи, Герман, Франц зэрэг өндөр хөгжилтэй орнууд дийлэнх олонх нь байдаг тул хөгжингүй орнуудын клуб гэж нэрлэх нь ч байдаг юм.

Ази тивээс Өмнөд Солонгос болон Япон улс гишүүнээр элссэн байдаг бөгөөд Тайланд нэгдсэн тохиолдолд Азийн гурав дахь, Зүүн өмнөд Азийн анхны гишүүн орон болох юм.

Эх сурвалж: MBC