Эрүүл зөв хооллож сурая

Оруулсан : T. Secret 2010-06-22 11:49:16

Эрүүл, зөв хооллож байх нь том соёл юм. Нэгэнт "буруу" хооллоод сурчихсан зуршилыг засах төвөгтэй байдаг. Энд хэрхэн эрүүл натурал хүнс хэрэлэх болоод хоолны дэглэм, зөв хооллох аргуудыг бичье.

Сэтгэгдлүүд



  • G. Саран 2010-06-22 11:53

    гоё сэдэв байна даа

  • B. Enkhzaya 2010-06-22 12:00

    Хооллох зөв дэглэм


    Хангалттай давтамжтай хоолло
    - Хоол, хүнс ходоодонд 4 цаг орчим байж боловсорч дуусаад цааш 12 хуруу гэдсийг дамжин нарийн гэдсэнд ордог. Өөрөөр хэлбэл хоол идсэнээс хойш 4 цаг болоод ходоод үндсэндээ "хоосон" болдог байна.

    - Энэ хугацааг үндэслэн 4 цагийн зайтай хооллох нь хамгийн тохиромжтой. Хүн хоногт 7- 8 цаг унтаж амрахад хангалттай байдгийг үндэслэн, үлдэж байгаа 16 цагт нь 4 удаа хооллоно.
    - Удаан хугацаагаар (6 - 8 цаг) хоол идэхгүй байх, дуртай цагтаа эмх замбараагүй хооллохын аль аль нь хоол боловсруулах эрхтний үйл ажиллагааг хямруулж өвчин эмгэгт хүрдэг.

    Тогтмол цагт хоолло
    - Тогтоосон цаггүйгээр хооллох нь ходоодны шүүс ялгарах хэмнэлийг алдагдуулж, аажимдаа хоол боловсруулах шүүсний хэмжээ, чанарын найрлага нь өөрчлөгдөж, хоол идэх дуршил буурна. Энэ нь яваандаа ходоодны архаг үрэвслийг үүсгэнэ.
    - Хэтэрхий удаан хугацаагаар хоосон явах, эсвэл нэг удаад их хэмжээгээр идэх нь эрүүл мэндэд эрсдэлтэй.

    Хооллох цагийн хуваарийн жишээ

    Цаг Цаг Цаг

    Өглөөний унд 07.00 07.30 08.00


    Бага үдийн унд / хоол 11.00 11.30 12.00

    Их үдийн хоол / унд 15.00 15.30 16.00

    Оройн хоол 19.00 19.30 20.00

    Хоногт хоол, хүнсээр авах илчлэгийн зөв хуваарилалт

    Өглөөний унд 20 - 25%
    Бага үд 10 - 15%
    Их үд 35 - 40%
    Оройн хоол 25%-иас илүүгүй
    Насанд хүрсэн хүн хоногт дунджаар 2200 ккал илчлэгийг хоол хүнсээр авна гэж үзвэл хоногийн хоолны илчлэгийн хуваарилалт ямар байх вэ?

    Өглөөний унд 440 – 550 ккал
    Бага үд 220 – 330 ккал
    Их үд 770 – 880 ккал
    Оройн хоол 550 ккал илүүгүй
    Нийт 2200 ккал

    Нийгмийн эрүүл мэндийн хүрээлэн
    www.hool.mn

  • B. Enkhzaya 2010-06-22 12:03

    Зохистой хооллолт


    Бие махбодын хэвийн үйл ажиллагааг хангахад зайлшгүй шаардлагатай шимт бодисыг агуулсан хоол, хүнсийг нас, хүйс, байгаль, цаг уур, ахуйн нөхцөл, хөдөлмөр эрхлэлт болон эрүүл мэндийн байдалдаа зөв тохируулан хэрэглэхийг зохистой хооллолт гэнэ.


    Зохистой хооллох 5 үндсэн зарчим

    - Өдөр бүр олон нэр, төрлийн хоол, хүнс хэрэглэх.
    - Хоол, хүнсээр авах илчлэгийн хэмжээг хянах
    - Хоол, хүнсэн дэх шимт бодисын хэмжээ нь зохистой харьцаатай байх
    - Хоол, хүнсээр авах шимт бодис нь Зохистой хэмжээтэй байх
    - Тэжээллэг чанар нь бие махбодын хэрэгцээг хангасан байх


    1. Олон нэр төрлийн хоол, хүнс хэрэглэх

    Шимт бодисын агууламж нь хүнсний бүтээгдэхүүний нэр төрлөөс шалтгаалан харилцан адилгүй байдаг. Тухайлбал мах, махан бүтээгдэхүүн уураг, өөх тосоор баялаг; сүү, сүүн бүтээгдэхүүн уураг, эрдэс бодисоор баялаг; хүнсний ногоо нь аминдэм, эрдэс бодисоор баялаг; үр тариан бүтээгдэхүүн (будаа, гурил) нь нүүрс усаар баялаг байх жишээтэй.
    Шимт бодисууд нь хүний бие махбодын өсөлт хөгжилт, үйл ажиллагаанд өөр хоорондоо харицан адилгүй өвөрмөц үүрэгтэй.
    Нэг буюу цөөн нэр төрлийн хүнсний бүтээгдхүүнийг дагнан хэрэглэх нь аль нэг төрлийн шимт бодисыг хэтрүүлэн хэрэглэх эсвэл дуталд өртөх эрсдэлтэй бөгөөд үндсэн шимт бодис, аминдэм, эрдэсын хэрэгцээгээ бүрэн хангах боломжгүй юм. Иймд “Монгол хүний зохистой хооллох ГЭР зөвлөмж”-ийг баримтлан өдөр бүр аль болох олон нэр төрлийн хоол, хүнс хэрэглэж хэвшээрэй.


    2. Хоногт хоол, хүнсээр авах илчлэгийн хэмжээг хянах

    Хүн өөрийн ажил мэргэжил, хөдөлгөөний идэвх, нас, хүйс, эрүүл мэндийн байдалдаа тохируулан хоол, хүнсээр хоногт авах нийт илчлэгийн хэрэгцээгээ тооцон хянах шаардлагатай.
    Та өөрийн хэрэгцээнээс илүү их хэмжээтэй илчлэг бүхий хоол, хүнс хэрэглэх нь илүүдэл жин, таргалалтад хүргэх бөгөөд улмаар чихрийн шижин, зүрх судасны өвчин, хавдраар өвчлөх эрсдэлтэй.


    Хоног хоол, хүнсээр авбал зохих илчлэгийн хэмжээг тооцох

    Биеийн хүчний дунд зэргийн ачаалалтай хөдөлмөр эрхэлдэг 160 см өндөртэй, 40 настай эрэгтэй хүний хоол хүнсээр авбал зохих илчлэгийн хэмжээг тооцъё.

    Байвал зохих “Эрүүл жин”-г тооцон олох
    - Эрүүл жин = биеийн өндөр (метр) х Биеийн өндөр (метр) х 22 (тогтмол тоо)
    - Эрүүл жин = 1,6 х1,6 х 22 = 56.3 кг

    Бодисын үндсэн солилцоо тооцох = Стандарт хэмжээ х Эрүүл жин
    - Бодисын үндсэн солилцоо = 22,3 х 56.3 = 1255.9 ккал
    - Стандарт хэмжээ
    Насны бүлэг Эр Эм
    18-49 22,3 21,7
    50-69 21,5 20,7

    Биеийн хөдөлгөөний идэвхийн коэффициент
    - Оюуны хөдөлмөр эрхэлдэг, хөдөлгөөн багатай – 1,5;
    - Биеийн хүчний дунд зэргийн ачаалалтай хөдөлмөр эрхэлдэг - 1,75;
    - Биеийн хүчний хүнд хөдөлмөр эрхэлдэг - 2,0

    Хоногийн нийт илчлэг = Бодисын үндсэн солилцоо х Хөдөлгөөний идэвхийн коэффициент
    - Нийт илчлэг = 1255.9 ккал х 1,75 = 2297,8 ккал
    Хоногт авбал зохих илчлэгийн хэмжээ


    3. Шимт бодисын агууламж нь зохистой харьцаатай байх

    Хоногт хоол хүнсээр авах нийт илчлэгийг 6 хэсэгт хуваавал, түүний 1 хэсэг нь уураг, 2 хэсэг нь өөх тос, 3 хэсгийг нь нүүрс уснаас авч байвал Таны хоногт хэрэглэх хоол, хүнс зохистой харьцаатай байна үзэж болно. Иймд төрөл бүрийн хоол, хүнсийг хооронд нь зөв зохицуулан, хослуулж хэрэглэх шаардлагатай.

    Нэг төрлийн хоолыг удаан хугацаанд дагнан хэрэглэх нь яваандаа хооллох дурыг бууруулж хоол боловсруулах эрхтэний хэвийн үйл ажиллагааг алдагдуулж, ходоод гэдэсний архаг үрэвсэл үүсгэх эрсдэлтэй. Жишээ: Мах, махан бүтээгдэхүүнийг дагнан хэрэглэх нь уураг, өөх тосны илүүдэл хэрэглээнд хүргээд зогсохгүй хоол боловсруулах эрхтэнд хэт их ачаалал өгч үрэвсэл, шархлаа үүсгэх эрсдэлтэй. Түүнчлэн биед хорт бодис хуримтлагдах, судас хатуурах, таргалах, хорт хавдраар өвчлөх эрсдэлд хүргэнэ.

    Хоногийн нийт илчлэгийн дийлэнх хэсгийг нүүрс ус буюу үр тариан бүтээгдэхүүнээс авбал зохино.


    4. Зохистой хэмжээтэй

    - Хоногт хэрэглэх хоол, хүнсний зохистой хэмжээг “нэг удаад идэх хэмжээ”, “хооллох нэгж” хэмээх ухагдахууныг ашиглан тодорхойлдог. “Монгол хүний зохистой хооллох ГЭР зөвлөмж”-д хоногт хэрэглэх хүнсний бүтээгдэхүүний хэмжээг “Хооллох Нэгж”-ээр илэрхийлсэн байдаг.
    - Шимт бодисоор хэмжээ чанарын хувьд бүрэн хангагдсан нөхцөлд л бие махбодын өсөлт хөгжилт, үйл ажиллагаа хэвийн явагдана. Мах, махан бүтээгдэхүүнийг дагнан хэрэглэх нь уураг, өөх тосыг хэтрүүлэн хэрэглэх, хүнсний ногоо, жимсийг бага хэрэглэсэнээр аминдэм, эрдэс бодис, эслэгийн дуталд хүргэж, улмаар хоол боловсруулах эрхтэн, зүрх судасны өвчин, хорт хавдар үүсэх эрсдэлтэй.
    - Бага насны хүүхэд, жирэмсэн ба хөхүүл эхчүүд сүү цагаан идээг бага хэрэглэх нь яс сийрэгжилт, шүд цооролт, Д аминдэмийн дуталд өртөх эрсдэлтэй.


    5. Тэжээллэг чанар нь бие махбодын хэрэгцээг хангасан байх

    - Хүнсний бүтээгдэхүүний тэжээллэг чанар нь түүний илчлэгийн хэмжээгээр бус, харин түүнд агуулагдах аминдэм, эрдэс бодисын хэмжээгээр тодорхойлогдоно.
    - Аминдэм, эрдэс бодисын агууламж өндөртэй хүнсийг тэжээллэг хүнс гэж нэрлэдэг.
    - Жимс, хүнсний ногоо нь аминдэм, эрдэс бодисын агууламж өндөртэй хамгийн тэжээллэг хүнс юм.

    eh survalj: Нийгмийн эрүүл мэндийн хүрээлэн
    www.hool.mn

  • T. Secret 2010-06-22 12:09

    Түгээмэл хоолны дэглэмүүдийн сайн тал болоод муу талууд

    Таргалалтын эсрэг хоолны дэглэм бол хурдан турах хамгийн шилдэг арга гэсэн онол нь дэлхий даяар ихэнх эмэгтэйчүүд хоолныхоо өмнө үргэлж хагас грейпфрутыг өөх хайлуулахад тус болно гэсэн найдлагатайгаар идэж байсан 1970-аад оны үед үүссэн гэж The Sun хэвлэл нийтэлжээ. Одоо үед хоолны дэглэм нь харьцангуй туйлын шинж агуулах болсон. Турах хүсэлтэй бүсгүйчүүд хоолны цэснээсээ бүх хоол хүнсийг хасч байнгын өлсгөлөнтэй эвлэрдэг болсон. Хамгийн түгээмэл дэглэмүүдийг туршиж сайн муу талыг шалган үзэхийн тулд The Sun хэвлэлийн сурвалжлагч үүнийг өөр дээрээ туршин үзсэн байна.

    1. Нэгдүгээр дэглэм сэтгүүлчид өдөрт 4 ширхэг жигнэмэг, хөнгөн оройн хоол буюу илчлэг нь нийтдээ 800 калори давах ёсгүй байлаа. Энэ аргын сайн тал нь гэвэл амттай зүйл хязгаарлах хэрэггүй бөгөөд дэглэм зохиогчдын үзэж буйгаар хүний биед хэрэгтэй витамин, эрдэс бодис агуулагддаг гэнэ. Дэглэмийг бариад долоо хоног дуусах дөхтөл сэтгүүлчийн гэдэс маш их өвдөж хайрцагтай жигнэмэг харж чадахгүй болжээ. Хэвлэлийн мэргэжилтний хэлж байгаагаар 800 калори бол огт өөр хоолонд дассан ходоодонд дэндүү бага хэмжээ юм гэжээ. Түүнээс гадна гурилан бүтээгдэхүүнд агуулагдах хүний биед хэрэгтэй бодисын хэмжээ амьдралын идэвхтэй байдалд хүрэлцэхгүй аж.


    2. Сэтгүүлчийн туршиж үзсэн хоёр дахь арга бол хүүхдийн хооллолт нэртэй бөгөөд өглөө, өдөр, оройн хоолны оронд хүүхдийн гурван шил органик тэжээл идэх байв. Үр дүн нь түрүүнийхээсээ дор байсан ба амтгүй хоол ямар ч юм идсэн мэдрэмж төрүүлэхгүй харин ч шоколад, гурилан бүтээгдэхүүн илүүтэйгээр бодогдуулсан аж. Мэргэжилтнүүд энэ дэглэмийг маш тэнэг гэж нэрлэсэн бөгөөд ганц сайн тал нь гэвэл цусан дахь сахар, давсны хэмжээний огцом бууралт, гэхдээ үүнийг эмчийн зөвлөгөөтэй цөөн удаа хийх шаардлагатай гэжээ.

    3. Америкт алдартай гурав дахь тураах арга бол гурван удаагийн хооллолтыг ид шидтэй ундаа болох тарианы сироп, дал мод, шинэхэн лимоны шүүс, цэвэр усаар орлуулах явдал юм. Энэ аргыг туршиж үзсэн сэтгүүлч дээрх аргуудаас хамгийн үр дүн сайтай гэж үзэж байна. Хоол орлуулах чихэрлэг амттай ундаа нь үнэхээр зөөлөн сайхан байсан боловч энэ нь эхний хоёр өдөр үргэлжилсэн байна. Дөрөв дэх өдрөө сэтгүүлчийн гэдэс маш чанга дуугарч босч ирээд толгой нь эргэн ухаан алдаж унам хүч чадалгүй сул дорой болжээ. Дэглэмийг туршиж үзсэн The Sun сонингийн сурвалжлагч энэ аргыг хүн төрөлхтний зохиож байсан хамгийн муу арга гэж нэрлэлээ. Чихэрлэг шингэн бол ямар ч ашиг шимгүй зөвхөн бие организмаас бүх хэрэгтэй бодисыг сорж авдаг. Энэ бүгд 3-5 хоногийн дотор барагдахад хүргэдэг аж.

    4. Дөрөвдэх арга нь юу хүссэн болгоноо нэг өдөр иднэ гэхдээ дараагийн өдөр нь өлсөх маягаар хосолж явах ажээ. Эхэндээ сайхан арга мэт санагдах боловч практик дээр хамгийн хэрцгий арга байдаг гэнэ. Турахыг хүссэн эмэгтэй өдөржингөө ходоодоо сунгаж, хүссэн бүхнээ идээд дараагийн өдөр нь бие организм даварч, түүнийгээ ахин давтахыг шаардана. Дэглэм зохиогчид 300 калориоор хязгаарлахыг санал болгож байна. Сэтгүүлч бүсгүйн хэлснээр иймэрхүү дэглэм нь биед ноцтой хор нөлөө учруулахгүй ч сэтгэл санаагаар унагаж, биеийн галбирт ямар нэг нөлөө үзүүлэхгүй гэжээ.
    Эх сурвалж:http://setguul.mn

  • T. Secret 2010-06-25 09:26

    Хүн бүхний сонссон япончуудын хэрэглэдэг энэхүү хоолны дэглэмийг 13 хоногийн туршид мөрдөж чадвал таны биеийн бодисын солилцоо эрс буурч 5 – 7 кг илүүдэл жингээ гээх болно.

    Хэрэв та дэглэмийг тэсвэр тэвчээр гарган мөрдсөн хэр нь 14 дэх өдрөөс нь цөцгийтэй банш идээд эхэлбэл таны жин мэдээж эргээд хуучин хэвэндээ орно. Тиймээс та багагүй хугацаанд дэглэм барьж хооллох хэрэгтэй.

    Япон хоолны дэглэм:

    Эхний өдөр: Өглөө – хар кофе/эсвэл ногоон цай/
    Өдөр – 2 ширхэг чанасан өндөг, ургамлын тостой шинэ байцааны салат, нэг стакан улаан лоолийн шүүс, эсвэл нэг ширхэг улаан лооль.
    Орой – шарсан эсвэл чанасан загас 200 гр, шинэхэн байцааны салат ургамлын тостой.

    2 дахь өдөр: Өглөө – хар кофе/эсвэл ногоон цай/,хатаасан талхтай.
    Өдөр – шарсан болон чанасан загас 200 гр. Шинэ байцааны салат.
    Орой нь 200 гр чанасан үхрийн мах. Нэг стакан тараг.

    3 дахь өдөр (зоригоо чангал): Өглөө – хар кофе/эсвэл ногоон цай/.
    Өдөр – түүхий өндөг, ургамлын тостой чанасан гурван лууван.
    Орой – алим /хэдийг ч идэж болно/.

    4 дахь өдөр ( бараг өлсгөлөн байна): Өглөө – хар кофе/эсвэл ногоон цай/.
    Өдөр – ургамлын тосонд шарсан алим, нэг том яншуйны үндэс
    Орой – төрөл бүрийн жимс.

    5 өдөр (тас хазах): Өглөө – жүржийн шүүсээр амталсан үрсэн түүхий лууван,
    Өдөр – шарж эсвэл чанасан загасны мах 500гр. Нэг стакан улаан лоолийн шүүс.
    Орой – жимс.

    6 дахь өдөр (цадталаа идэх): Өглөө – хар кофе/эсвэл ногоон цай/.
    Өдөр – чанасан тахиа 500г, шинэ байцаа, луувангийн салат.
    Орой– чанасан өндөг 2 ширхэг, түүхий луувангийн салат ургамлын тостой.

    7 дахь өдөр: Өглөө – цай.
    Өдөр – чанасан үхрийн мах 200 гр, төрөл бүрийн жимс.
    Орой – 3 дахь өдрөөс бусад бүх өдрүүдээс аль нэгийг нь сонго.

    8 дахь өдөр: Өглөө – цай.
    Өдөр – үхрийн мах 200гр,төрөл бүрийн жимс.
    Орой нь – 3 дахь өдрөөс бусад өдрүүдээс сонго.

    9 дөх өдөр: Өглөө – хар кофе/эсвэл ногоон цай/.
    Өдөр – чанасан тахианы мах 500гр, шинэ лууван, байцааны салат.
    Орой – 2 ширхэг чанасан өндөг, түүхий луувангийн шүүс, ургамлын тостой.

    10 дахь өдөр: Өглөө – түүхий лууван жүржийн шүүстэй.
    Өдөр – чанасан, шарсан загас 500гр, стакан улаан лоолийн шүүс.
    Орой – төрөл бүрийн жимс.

    11 дэх өдөр: Өглөө – хар кофе/эсвэл ногоон цай/.
    Өдөр – нэг чанасан өндөг, 3 ширхэг чанасан лууван ургамлын тостой. Хатуу бяслаг 15 гр.
    Орой – төрөл бүрийн жимс.

    12 дахь өдөр: Өглөө – хар кофе/эсвэл ногоон цай/, хатаасан талх.
    Өдөр – ургамлын тосонд шарсан нэг том хурган гуа, алим, хар кофе, хатаасан талх.
    Орой – чанасан үхрийн мах 200гр, стакан тараг.

    13 дахь өдөр: Өглөө – хар кофе/эсвэл ногоон цай/.
    Өдөр – чанасан өндөг, ургамлын тостой байцааны салат, стакан улаан лоолийн шүүс.
    Орой – шарсан эсвэл чанасан загас 200гр.

    Зарим өдөр таны авах ёстой калор нь 700 ккал хүртэл буурч таны жин огцом хасагдана. Бага калортай хоолны дэглэм сахих нь үүгээрээ богино хугацаанд турах сонирхолтой хүмүүст таалагддаг.

    Гэхдээ огцом жин хасах нь эрүүл мэндэд сөрөг нөлөөтэйг анхаарах хэрэгтэй.

    Нэгд. Аминдэм бичил элэементүүдээр дутмаг хоол хүнс хэрэглэх болно. Тос их, харин уураг, нүүрс ус багатай хүнс хэрэглэнэ.

    Хоёрт. Хар кофег дээрх дэглэмээс бусад тохиолдолд байнга хэрэглэвэл ходоодны үрэвсэлтэй “мэндчилэх” болно. Тиймээс шаардлагагүй үед хар кофе өлөн дээрээ уухгүй байсан нь дээр.

    Ер нь япончууд өөрсдөө хооллох үндэсний дэг жаягаа “алтан дүрэм” хэмээн нэрлэдэг юм байна. Энэхүү дүрмээр бол,

    ▪ Өдөр, оройн хоол бүрт зориулан тун бага орц бүхий олон төрлийн хүнс хоол бэлтгэдэг. Баяр ёслол бус өдөр тутмын энгийн зоогонд зориулж 5 -20 төрлийн этгээд сонин орц бүхий хоол бэлтгэдэг байна. Ийм олон нэр төрлийн хоолны санаа нь хүнийг бас амраадаг юм.

    ▪ Сулхан галаар хоолоо болгодог нь аминдэмийг дээд зэргээр хадгалах боломжийг бүрдүүлж өгдөг.

    ▪ Цагаан будааг талхтай хамт хэрэглэх.

    ▪ Хоолны үндсэн орц нь загас, цагаан будаа, шар буурцаг, төрөл бүрийн ногоо, ногоон цай, жимс, цитруисын төрлийн жимс буюу нимбэг, жүрж орно. Гол хүнс нь загас, далайн гаралтай бүтээгдэхүүн. Өдөрт нэгээс илүүгүй өндөг, хагас стакан сүү хэрэглэх.

    ▪ «Шидэт» ногоон цайг байнга ууна. Ногоон цай нь залуу нас, эрч хүчийг бэлэглэгч С болон Е аминдэмээр баялаг, хор тайлах үйлчилгээ үзүүлдэг.

    ▪ Цагаан будааны гурилаас гарган авсан ундаа, жимсний дисерт идэх

    ▪ Хоол идэх, цай уух нарийн ёслол дэг жаяг, хоолны хэрэгслийн нандин тансаг байдлыг бүрдүүлэх.

    ▪ Хооллохдоо модон савх хэрэглэх. /Үүгээр та хоёр минутад бүгдийг ховх залгичих боломжгүй./

    Та эргэлзэхийн хэрэггүй. Юунд гээч. Өдөр тутам зооглож заншсан тостой бууз, шарсан банш, өндөгтэй хуймаг, шарсан төмсийг “япон жороор” сольчихвол 5 – 7 кг илүүдэл жингээ гээнэ.

    Япончуудын “алтан дүрмийг” мөрдөж хоолловол та илүүдэл жингээсээ хагацахын зэрэгцээ эрүүл мэндэд тань тустай. Япон үндэсний хоолноос аль жорыг нь сонгох нь таны л хэрэг. Гэхдээ түргэн болдогт нь бус харин таны бие махбодид илүү тохирч буйг нь сонгох хэрэгтэй.

  • T. Secret 2010-06-25 09:31

    Ер нь дээрх япон дэглэм нь үнэндээ зөв хооллох арга хэлбэрийн нэг юм. Тиймээс турах гэлтгүй эрүүл хооллох арга гэж ойлгож болно. Учир нь таргалалт хүн төрөлхтнийг нөмөрч байгаа тахал гэж үзээд үүнээс салах хамгийн энгийн арга нь өдөрт хоол хүнснээс авах ёстой Калори-оо багасгавал эрүүл, чийрэг урт удаан насалж амьдарна гэж эрдэмтэд судлаж баталсан байна. Уурагийн тэнтвэрт байдлыг хамгийн зөв хангасан дэглэмийн нэг нь энэхүү япон жор ажээ.

  • T. Secret 2010-06-25 09:35

    Англи дэглэм

    Англи дэглэм нь хоолны дэглэмүүдийн хамгийн чухал “орой бага идэх” гэдэг дүрмийг зөрчиж “өдрийн нормынхоо” ихэнхи хэсгийг орой идэх заавартай ер бусын дэглэм юм. Харин өглөө аль болох бага идэхийг шаарддаг. Ийм байдлаар хооллоод туранхай байх боломжгүй мэт санагдах боловч англичуудын угын шөрмөслөг туранхай төрхийг санахаар үнэмшихээс өөр аргагүй.

    Хэрэглэх заавар.

    Энэ дэглэмийг урт хугацаагаар барина. Та хэр их турах шаардлагатайгаас хамаарч 21 хоногоос хагас жил хүртэл барьж болно. Өдөрт 2л-ээс багагүй ус ууна. Давс болон бусад амтлагчаар хоолоо амтлахгүй байх ёстой. Хатаасан гоньд, яншуй мэтийн ногоогоор амталж болох. Шарсан хуурсан хоол идэж болохгүй, зөвхөн чанах, жигнэх байдлаар хоолоо боловсруулах ёстой.

    Доор дурьдсанаас жишээ авч хооллоорой:

    Өглөө: чанасан өндөг, зүсэм хивэгтэй, эсвэл бүхэл буудайны талх, 100гр шинэхэн шахсан шүүс юм уу ургамлын цай.

    -эсвэл: 2 амны халбага гурвалжин будааг усанд чанаад, тослоггүй сүүгээр сүлнэ. Давс, сахар мэдээж хийхгүй. Араас нь 1 ш алим иднэ.

    -эсвэл: 200 гр. алим хэрчээд+200г чихэргүй тараг.

    -эсвэл: 50 гр. овсянк /геркулес/ усанд чанаад + 1 а/халбага үзэм, 1 аяга сүү.

    Өдөр: таваг ногоотой шөл, бүхэл буудайны талх 1 зүсэм, 25 гр. бяслаг, 1 ш. алим.

    -эсвэл: аарцтай төмс. Төмсийг хальстай нь духовканд болгоод голоор нь хуваагаад дээрээс нь хатаасан жимстэй хольсон аарцаар бүрнэ. 1 халбага оливын тосоор амталсан ногооны салат. 1 ш. алим юмуу жүрж.

    -эсвэл: 1 ш. өндөг + 1 стакан сүү+ 1 амны халбага гурилаар омлет хийнэ. Омлетондоо помидор, амтат чинжүү, навчин салат зэргийг нэмж болно. Хачиранд нь 50 гр. шош буурцаг. Алим юмуу лийр.

    -эсвэл: 100гр. чанасан шош буурцаг, 100 гр. сэврээсэн талх, шинэ жимснүүд.

    Орой: сүүнд чанасан ногооны шөл, 100 гр. чанасан мах, бүхэл буудайн талх, 25 гр. бяслаг, 50 гр. дэвтээсэн чангаанз.

    -эсвэл: 2 ш. чанасан өндөг, 100 гр. шош буурцаг, 100 гр. жимс.

    -эсвэл: аарцтай төмс, 50 гр. шош буурцаг, байцаа луувангийн салат, стакан тараг /чангаанз хэрчиж нэмж болно/.

    Илүү хурдан туръя гэвэл долоо хоногын хоёр өдрийг нь “ногооны өдөр” болгож болно. Талх, жимс, мах, шош буурцгаа хасна гэсэн үг. Төрөл бүрийн ногоогоор салат хийж оливын тосоор амталж идэх ба зөвхөн ногоон цай ууна.

    Үр дүн.

    3 долоо хоног барихад 3-4 кг турна. 4 сар орчим болоход 10 кг турна. Хагас жил барьж чадвал 20 кг хүртэл жин хаяна. Хамгийн гол нь үр дүн нь маш тогтвортой хадгалагддаг. Мөн организм цэвэрлэгдэх, бодисын солилцоо сайжрах, залуужих зэрэг таатай үр дүнгүүд гардаг.

    Давуу талууд.

    -Нээх их өлсөөд зовоод байдаггүй. Хангалттай хооллож байгаа учраас витамины дутагдал, депрессд орох гэх мэтийн сөрөг үзэгдэл гардаггүй.

    -Хэвийн хооллож, хэт их идэхгүй л бол буцаж таргалахгүй гоолиг чигээрээ үлдэх боломжтой хамгийн таатай дэглэм.

    Сул талууд.

    -Урт хугацааны дэглэм учраас хэдэн долоо хоног, тэр тусмаа хэдэн сар барихаар сэтгэл шулуудах маш хэцүү байдаг. Маш их тэвчээртэй, хүчтэй хүний л чаддаг ажил.

    -Ийм урт хугацаанд давсгүй хоол иднэ гэдэг дэндүү бэрх байж болох юм.

    эх сурвалж:http://www.orosshkolton.mn

  • T. Secret 2010-06-25 09:37

    Сүүн дэглэм

    Сүүн дэглэмийг бас “цагаан дэглэм” гэж нэрлэх нь бий. Учир нь энэ дэглэмд сүүн бүтээгдхүүн, өндөг, овсянк мэтийн цагаан өнгийн хүнс түлхүү хэрэглэгддэг. Сүү тараг, цөцгийний хорхойтнууд энэ дэглэмийг голчлон хэрэглэдэг. Сүүн бүтээгдхүүн эрт дээр үеээс ихэд үнэлэгдэж ирсэн бөгөөд үүн дээр суурьлагдсан эмчилгээний дэглэмүүд ч олон байдаг. Учир нь сүүн бүтээгдхүүн ашигтай бодисоор дүүрэн байдгаас гадна уургийг ч хангалттай хэмжээгээр агуулдаг.

    Хэрэглэх заавар

    Сүүн дэглэм гэхээр л хөргөгчөө сүүн бүтээгдхүүнээр дүүргээд зөвхөн тэрийгээ ялалтанд хүртлээ иднэ гэсэн үг биш юм. Нэгдүгээрт, хичнээнийг идэх вэ гэдгээсээ илүү ямар чанартайг нь идэх вэ гэдгийг мэдэх нь чухал. Бидэнд бол тослог багатай сүүн бүтээгдхүүн нь хэрэгтэй шүү гэдгийг анхаараарай. Хоёрдугаарт, дэглэмийн үеээр жимс, ногоо ч хэрэглэгдэнэ. Жимсний хувьд, исгэлэн жимс энд хэрэггүй, учир нь угаас исгэлэн сүүн бүтээгдхүүн түлхүү хэрэглэх болохоор жимс маань өөр төрлийнх байсан нь дээр. Тэгэхээр, гадил, тоор, амтлаг лийр байж болно. Мөн үзэм, хар чавга болно. Алим, жүрж, мандарин мэтийг түр хойш тавих хэрэгтэй. Төмс лууван мэтийн илчлэг ихтэй ногоо хориотой гэдэг нь ойлгомжтой биз.Сүүн дэглэмийг 7 хоног барина, илүү хэрэггүй. Нэмж турмаар байвал 10-14 хоног завсарлаад дахин барьж болох юм. Өдөрт 4 удаа хооллоно. Өглөөд чихэргүй йогурт 200гр., атга үзэм, хар чавга идээд халбага зөгийн бал хутгасан цай ууна. Бага үдэд овсянкийг шингэлсэн сүүнд давс, чихэргүй чанаад, 100 гр. аарц, аяга сүү. Өдөр- 1ш. чанасан өндөг, цөцгийгээр амталсан ногооны салат. Эсвэл салатны оронд 100гр. аарцыг хатаасан жимстэй холиод идсэн ч болно. Араас нь аяга тараг ууна. Орой- 1ш. зөвшөөрөгдсөн жимс, жижиг савтай йогурт. Иймэрхүү маягаар 7 хоног хооллоорой.

    Үр дүн

    Сүүн дэглэмийг 7 хоног барихад 5кг хүртэл турах бөгөөд дэглэмээс гарангуут буцаж хурдан таргалдаггүй онцлогтой.

    Давуу талууд:

    -Цагаан хоолтон байснаар нүүрний арьс нэлээд цэвэршдэг.

    -Цай, кофе мэтийн шүд харлуулдаг ундаанаас холдсоны үр дүнд шүд бага зэрэг цайрдаг.

    -Ходоод гэдэсний үйл ажиллагаа сайжрахаас гадна нарийн бүдүүн гэдэсний микрофлор нэмэгдэнэ.

    -Бие организмын дархлаа дээшлэнэ.

    -Сүүн бүтээгдхүүн кальцаар баялаг тул шүд, яс бэхжиж мэдрэлийн системд бас сайн нөлөө үзүүлнэ.

    Сул талууд:

    -Ходоодны эмгэгтэй, ялангуяа ходоодны шархтай хүн энэ дэглэмийг барьж хэрхэвч болохгүй. Мөн сүүн бүтээгдхүүнийг боловсруулах фермент ялгардаггүй хүмүүс байдаг, тийм хүмүүс хэрэглэх боломжгүй.

    -Угийн сүү тараг их хэрэглэдэг хүмүүс энэ дэглэмийг барьж болохгүй, учир нь кальц ихдэснээс бодисын солилцоонд өөрчлөлт орж, мах мэтийн уургийг боловсруулахад хүндрэлтэй болж магад.

    эх сурвалж:http://www.orosshkolton.mn

  • T. Secret 2010-06-25 09:38


    Усан үзмэн дэглэм

    Усан үзэм бол турах дэглэмний хувьд нэлээн маргаантай жимс юм байна. Нэг хэсэг нь, усан үзэм чихэрлэг амттай болохоор тураах дэглэмд таарахгүй жимс гэж үзэж байхад, нөгөө хэсэг нь, усам үзэм дэхь чихэр бол сахар биш, фруктоз болохоор таргалуулахгүй, “хөөрхийг олон жил хэлмэгдүүлсэн байна лээ” гэж хамгаалдаг. Мөн усан үзэм хоол боловсруулалт болон бодисын солилцоог сайжруулдаг учраас бидний идсэн хоолыг идэвхитэй задалж тусалдаг гэнэ. Америкийн эрдэмтэд усан үзэмнээс инсулиний солилцоонд маш сайнаар нөлөөлдөг бодисыг илрүүлсэн тул усам үзмэнд дуртай хүмүүс чихрийн шижингээс айлтгүй гэж зарласан байна.

    Хэрэглэх заавар.

    Усан үзэмний дэглэм 3 хоногын, 7 хоногын гэж байгаа.

    3 хоногын дэглэм баръя гэвэл эхний өдөр 0,5кг, хоёрдахь өдөр нь 1,5 кг, гуравдахь өдөр нь 2 кг усан үзэм иднэ. Өдрийн нормоо 2 цаг тутам идэхээр тооцоолж тэнцүү хуваана.

    7хоногын дэглэмийг 24 цагийн мацаг барилтаар эхлэнэ. Юу ч идэхгүй гэсэн үг. 2дахь хоногоос өдөр болгон 1,5 кг усан үзэм идэн, мөн тийм хэмжээний ус ууна. Бусад бүх юм хориотой. Ямар ч хөнгөн жимс ногоо, чихэргүй цай кофе гэх асуудал байхгүй, зөвхөн усан үзэм!!!

    Үр дүн.

    3 хоногын дэглэмээр 2 кг турна. 7 хоногынхоор бол 4 кг.

    Давуу талууд.

    -Хоол боловсруулах системын ажиллагаа сайжирна.

    -Бодисын солилцоо түргэсэн таргалалт багасна.

    -Усан үзэм уушигны хорт хавдраар өвдөх магадлалыг бууруулдаг. Тиймээс, тамхичин хүмүүс ч үе үе усан үзэмний дэглэм барьж байхад буруутахгүй юм.

    -Усан үзэм дэхь кали, кальци, магни, төмөр, фосфор, кобальт зэрэг элементүүд булчин, яс, тархи, үс, хумс зэрэгт сайнаар нөлөөлдөг.

    -Усан үзэмний үрэн дотор байдаг полифенол хөгшрөлтийн эсрэг үйлчилгээтэй.

    Сул талууд.

    -Усан үзэмний хальснаас болж ходоодонд эвгүй оргих, өтгөн хатах зэрэг асуудал гардаг. Тиймээс, нимгэн хальстай усан үзэм сонгоорой.

    -Зарим хүмүүс 3-аас дээш хоног усан үзэм идэхэд толгой өвдөж магад. Энэ тохиолдолд аяга халуун ус уугаад агаарт алхавал тус болно. Хөнгөн гимнастик хийж байвал бас тустай.

    -Усан үзмээс өөр бүх хүнс хориотой тул маш хатуу дэглэм. Жинхэнэ “гүргэр” байж л тэснэ.

  • B. Enkhzaya 2010-06-25 10:02

    хэрэгтэй мэдээллэл байна шүү =) надад тэр англи дэглэм нь арай гайгуй таарах шинжийн ккк

  • T. Secret 2010-06-25 10:13

    Залуу, эрүүл чийрэг байхад эрүүл хооллолт хамгийн чухал билээ. Хүний биед хамгийн хэрэгтэй 10, хамгийн хэрэггүй 4 хүнсийг та бүхэндээ сонирхуулъя.

    ХЭРЭГТЭЙ 10

    Хүрэн будаа

    Хүмүүс нүүр ус ихтэй хүнс хэрэглэвэл таргалдаг гэж боддог. Гэтэл энэ нь биеийн эрч хүчийг хэвийн байлгахад хамгийн хэрэгтэй аж. Хүрэн будаа нь цусан дахь холестерины хэмжээг бууруулах, зүрх судас, шулуун гэдэс өвчлөх, цөс чулуужих, чихрийн шижин тусах, хэт таргалах зэрэг өвчнүүдээс сэрийглэхээс гадна нас ахих тусам идэвхи нь буурдаг ходоод гэдэсний үйл ажиллагаанд сайнаар нөлөөлдөг байна.

    Өндөг

    Өндөг нь уургаар баялаг учир нүдэнд цагаа унахаас хамгаалж, цусны бүлэгнэлийг арилгаж, зүрх хаагдах эрсдэлийг бууруулдаг аж. Долоо хоногт 6 өндөг хэрэглэдэг хүн хөхний хавдраар өвчлөх эрсдэл 44 хувь буурдаг гэдэг нь судалгаагаар нотлогджээ. Диетологичдын үзэж буйгаар өдөрт 1-2 өндөг идэх нь холестерины хэмжээг нэмэгдүүлдэггүй гэнэ.

    Сүү

    Нас ахих тусам бие организм илүү их кальцийг шаарддаг. Сүүнд ясанд хэрэгтэй кальци ихээр агуулагддаг. Өдөрт 2 стакан сүү хэрэглэх эсвэл йогурт, тараг, мөн кальци баялаг жимс ногоо хэрэглэж байх хэрэгтэй.

    Бууцай

    Энэ бол төмөр болон С, А, К витамины баялаг эх үүсвэр бөгөөд шулуун гэдэсний хавдар, артрит зэрэг өвчнөөс сэргийлэхээс гадна нүдний хараанд хэрэгтэй лютеин хэмээх бодисоор баялаг байна.

    Гадил

    Зөвхөн нэг ширхэг гадил 467 мг кали агуулдаг бөгөөд зүрх болон бусад булчингийн эдүүдэд хэрэгтэй. Мөн артерийн судасны даралтыг бууруулах, хүчлийг саармагжуулдаг учир түлэгдэл зэргийн үед сайнаар нөлөөлдөг.

    Тахианы мах

    Тахианы мах бол эрүүл мэндэд хамгийн сайн мах юм. Ялангуяа өөх тос багатай цээжин хэсгийг хэрэглэж, шарсан хуурсан, тостой гадаад хэсгийг нь бага хэрэглэх хэрэгтэй. Уураг баялаг учир ясны жингийн хэмжээг бууруулж, тархины үйл ажиллагааг сайжруулж, эрч хүч нэмэгдүүлдэг.

    Яргай загас

    Холестерины хэмжээг бууруулж, хэд хэдэн төрлийн хавдар үүсэхээс сайтар сэргийлдэг. Никотины хүчлийг агуулдаг ой санамжаа алдах өвчнийг анагаах, ядаргаа гаргах, Алцгеймерын өвчнөөс урьдчилан сэргийлэх үйлчилгээтэй гэдэг.

    Нэрс

    Нэрсэнд нүдэнд цагаа унахаас сэргийлдэг маш олон төрлийн бодис агуулагддаг. Мөн геморрой, судас бүдүүрэх, ходоод шархлах, зүрх судасны өвчин, хавдар тусах зэргээс сэргийлдэг. Хоол боловсруулах эрхтний үрэвслийг эдгээж, ходоодны хямралыг арилгадаг.

    Ногоон ургамал

    Нас ахих тусам бидний амтлах мэдрэмж буурдаг бөгөөд давс их хэрэглэх хандлагатай болдог. Гэтэл давс даралт нэмэгдүүлдэг учир аль болох ногоон ургамалын хүнсээр ахиу хооллох нь зүйтэй.

    Сармис

    Хавдрыг бууруулах, зүрх судасны өвчлөлийг эдгээх нөлөөтэй. Чихрийн шижин өвчтэй хүмүүс хэрэглэвэл илүү сайн.

    ИХЭЭР ХЭРЭГЛЭХ ХЭРЭГГҮЙ 4

    Амттан

    Жин нэмэгдүүлэхээс гадна хэдийгээр калори ихтэй ч хэрэгцээт бодис маш бага агуулагддаг.

    Давс

    Даралт нэмэгдүүлдэг учир өөр бусад амтлагч хэрэглэх нь зүйтэй. Гэхдээ соус, цуу зэрэгт агуулагддаг “нуугдсан” давснаас сэргийлээрэй.

    Спирт

    Спиртийн төрлийн зүйлд хэт их калори агуулагдах учир хүнснээс бие организмд шингэх ёстой хэрэгцээт бодисууд шингэхэд маш их саад болдог.

    Өөх тос

    Мах, бяслаг, тахианы махны арьс, зайрмаг зэрэгт өөх тос хамгийн их агуулагддаг. Холестерины хэмжээг ихэсгэж, жин нэмэгдүүлдэг.


    Эх сурвалж:
    www.medeelel.mn

  • T. Secret 2010-06-25 10:17

    Жингээ хасч эрүүлжихэд тустай 7 хүнс

    Саяхан Токиогийн Их сургуулийн хэсэг эрдэмтэд нэгэн судалгаа явуулсан нь тун сонирхолтой дүгнэлтэд хүрчээ. Юу гэвэл уг судалгаагаар ус иээр агуулсан бүтээгдэхүүнийг өдөр тутмын хоол хүнсэндээ түлхүү хэрэглэдэг бүсгүйчүүд илүү бага жинтэй, бэлхүүс нарийхантай байдгийг тогтоосон байна. Харин Smachno.ua сайтад 90-ээс багагүй хувьд нь ус агуулсан хүнсний бүтээгдэхүүний нэрсийн жагсаалтыг гарган тавьжээ. Энэхүү жагсаалтад орсон бүтээгдэхүүн нь бие организмд ашигтай эрдэс бодис агуулахын зэрэгцээ жингээ барих, хасахад ихээхэн тустай байдаг гэнэ.

    Жин хасахад нөлөөлж буй гол шалтгааныг нь эрдэмтэд устай холбон тайлбарлаж байгаа юм.

    Брокколи байцаа– Аминдэмийн “бөмбөг”

    Броколли байцааг хоол хүнсэндээ тогтмол хэрэглэх нь стрессын эсрэг хамгийн сайн зэвсэг болдог юм. Энэхүү гайхамшигтай ногоо нь Газрын дундад тэнгис орчмын нутгаас гаралтай бөгөөд “брокко” гэсэн итали нэр нь мөчир, салаа гэсэн утгатай аж.

    Брокколид нимбэгтэй адил хэмжээний С аминдэм агуулагддаг бөгөөд кальци, кали, фолиевын хүчил, бета-каротинээс эхлээд маш олон эрдэс бодистой тул аминдэмийн “бөмбөг” хэмээн нэрлэдэг. Брокколи нь бие организмын дархлааг сайжруулж, цус багадалт, халдвар, элэгний өвчин, хавдраас урьдчилан сэргийлдэг. Үүнээс гадна хөгшрөлтийн үйл явцыг удаашруулах нөлөө үзүүлдэг байна. Брокколиг ууранд болгож хүнсэндээ хэрэглэвэл аминдэм, эрдэс бодис нь илүү сайн хадгалагдаж үлддэг.

    Байцаа

    Байцаа нь антиоксидантаар нэн баялаг тул биеийн дархлааг сайжруулах хамгийн сайн “зэвсэг” болдог. Ялангуяа исгэсэн байцаанд С аминдэм маш баялаг байдаг юм. Иймд хүнс судлаачид байцааг түүхийгээр идэхийг зөвлөдөг. Ингэхдээ алим болон луувантай хольж байцааны салат хийх хэрэгтэй. Харин хүрэн байцааны хувьд таны биед нэн шаардлагатай микроэлементийн гол эх үүсвэр болдгийг мартаж болохгүй. Бас кали, магни, фосфор, кальци, төмөр, А, В1, В2, В6 аминдэмээр баялаг байдаг юм.

    Элдэв өвчний үед байцаа, түүний шүүсийг хоол хүнсэндээ түлхүү хэрэглэх хэрэгтэй. Байцаа нь организмаас холестериныг зайлуулж, гэдэсний гүрвэлзэх хөдөлгөөнийг сайжруулна.

    Цэцэгт байцаа

    Хавдрын эд эсийн өсөлтийг сааруулах, улмаар хавдар үүсэхээс сэргийлэх шидтэй ургамлын нэг нь цэцэгт байцаа юм. Цэцэгт байцаа нь фолиевын хүчлийн байгаль дахь хэлбэр болох фолат болон С аминдэмийн баялаг эх үүсвэр болдог. Ийм учраас ууранд болгосон, чанасан, түүхий аль ч хэлбэрээр өдөр тутмын хоол хүнсэндээ хэрэглэж заншвал сайн.

    Цэцэгт байцаа нь кали, магни, кальци, марганц, төмөр, зэс, фтор, каротин, С, К, В1, В2, В6 аминдэмээр баялаг байдаг.

    Грейпфрут

    Энэ жимс нь жүржтэй тун төстэй. Жүржийг бодвол илүү исгэлэн амттай бөгөөд зүрхийг эрүүл байлгахад ихээхэн тустай жимс. Грейпфрутэд агуулагдах нарингин хэмээх бодис нь хоол боловсруулах үйл явцыг хурдасган, бодисын солилцоог тогтворжуулж, гэдэсний гүрвэлзэх хөдөлгөөнийг сайжруулдаг тул жин буурахад нөлөөлдөг гэх. Саяхан дөрвөн жилийн өмнө эрдэмтэд грейпфрут нь зөвхөн турахад төдийгүй, чихрийн шижин өвчнийг анагаахад тустай болохыг илрүүлжээ. Сахарын агууламж бүхий бодисын солилцоог түргэсгэдэг чанар нь үүнд нөлөөлдөг юм байна. Мөн цусан дахь сахарын агууламжийн түвшин буурснаар цус харвах эрсдэл ч багасдаг аж.

    Ягаан, улаан өнгийн жимсэнд судасны ханыг гэмтэхээс сэргийлдэг ликопен болон Ааминдэм илүү хэмжээтэй агуулагдана. Мөн C аминдэм, фолиевын хүчил, калигаар баялаг. Жимсээ худалдан авахдаа хатууг нь сонгоорой.


    Салат

    Энэ ногоо нь хамгийн бага илчлэгтэй гэдгээрээ бүх л төрлийн хоолны дэглэмд ордог юм. Нэг кг шанцай гэхэд ердөө 120 – 150 калори илчлэгтэй.

    Шанцай нь В-гийн төрлийн аминдэмээр нэн баялаг төдийгүй фолтевын хүчил, марганцийг агуулсан байдаг тул цусан дахь сахарын түвшинг тогтворжуулж, биеийн дархлааг бэхжүүлдэг.

    Чидун жимсний тостой шанцай нь жингээ хасахад хамгийн тохиромжтой хоол болдог.

    Кали, кальци, магни, төмөр, фосфор, В, А, С аминдэмээр баялаг.

    Редис

    Редисыг бүр эрт үеэс хүнсний ногоонд хэрэглэж ирсэн гэдэг юм. Эртний египет, грек, хятадууд түүнийг хэрэглэдэг байсан гэх бөгөөд radix хэмээх латин үг нь үндэс гэсэн утгатай. Редис нь таатай, хурц, өвөрмөц амттай байдаг нь эфирын тосны нөлөө юм. Редисын илчлэгт чанар нь улаан лооль, хаш, хурган гуагийнхтай ойролцоо ч уургийн агууламж нь хоёр дахин их байдаг. Редис нь их хэмжээний антиоксидантийг агуулдаг тул хоол боловсруулах үйл явцыг хэвийн байлгахад нөлөөтэй. Мөн С аминдэмийн агууламж нь ижил төрлийн хүнсний ногоог бодвол 6 дахин их.

    Мөн натри, кали, кальци, фосфор, магни, төмөр, фтор, A, E, B1,B2,B6, C, аминдэм болон никотин, салицилын хүчил агуулдаг.

    Энэ шинж чанараараа таргалалт, зүрх судасны өвчнийг анагаахад тустайн дээр ходоодны шүүсний ялгаруулалтыг нэмэгдүүлж хоол боловсруулах үйл явцыг хурдасгаж өгдөг. Мөн редис нь сармис, улаан лооль, хүрэн манжин, навчит байцаатай ижил, хурган гуагаас / кабачок/ хоёр дахин их ислэгтэй. Иймд редисыг зүрх судасны өвчин, хэт таргалалтын үед хүнсэндээ түлхүү хэрэглээрэй.

    Редисын шүүсийг жин хасах үедээ уух нь тун ашигтай. Луувангийн шүүстэй хольж уувал илүү аминдэмлэг, илүү амттай болдог юм.

    Бууцай

    Бууцайг францчууд “ногооны хаан” бас “ходоодны шүүр” гэж ч нэрлэдэг. Учир нь бууцай ходоодны шүүсийг ялгаруулж, гэдэсний гүрвэлзэх хөдөлгөөнийг тогтворжуулдаг юм. Шинэхэн бууцайны бараг 90 хувь нь ус. Мөн 3,5 мг төмөр агуулдаг нь төмрийн агууламж маш өндөр гэсэн үг. Бууцай нь бас уургаар баялаг төдийгүй фолиевын хүчил, К аминдэм, бета-каротин, С аминдэм, лютеинээр баялаг тул нүдний хараанд эерэгээр нөлөөлдөг байна.

    Кали, кальци, фосфор, магни, натри, төмөр, цинк, С, В1, В2, В6, РР, Е, К, аминдэм, А буюу провитаминыг ч агуулсан байдаг. Бууцайг салат, зууш, шөлөнд хэрэглэхэд илүү тохиромжтой.

  • T. Secret 2010-06-25 10:20

    7 хоногийн хоолны цэс

    Энэхvv хоолны цэс нь эрдэс бодис, витамин, өөх тосыг маш нарийн хуваарилж өгсөн. Уг цэсэнд тослог багатай, сахар бага агуулсан голчлон vр тариа, 5-6 төрлийн жимс жимсгэнэ, хvнсний ногоо орсон байгаа. Гэхдээ энэхvv цэсэнд орсон ногоо жимс жимсгэнийг сонгохдоо хадгалалт, шинэ соргог эсэхийг нь анхаараарай.

    Даваа гариг
    Өглөө: Жимсний шvvс, шар хөмрөгний каша, шинэ жимс
    Өдөр: Соусаар амталсан бvрмэл загас
    Орой: Лууван, цэцгэн байцааны салат, сыр

    Мягмар гариг
    Өглөө: Мөөгний цутан шөл эсвэл улаан лоолийн шvvс
    Өдөр: Тарганд хутгасан байцааны салат, хар талх, шар хөмрөгийн хөөсөнцөр, жимс
    Орой: Улаан лооль, өргөст хэмхний өндөг цөцгийгөөр амталсан салат

    Лхавга гариг
    Өглөө: Жимсний шvvс эсвэл сvv, йогурт, гадил жимс, зөгийн балтай буцалсан ус
    Өдөр: Луувангийн соустай сырээр амталж шарсан тахианы мах, жимс, жимсний бялуу
    Орой: Шинэ ногооны салат-майонезгvй

    Пvрэв гариг
    Өглөө: Тослоггvй йогурт, алимны нухам, алим
    Өдөр: Талхны сэндвич, жимсний салат
    Орой: Мөөгний цутан шөл,

    Баасан гариг
    Өглөө: Жимсний шvvс, шар хөмрөгийн хөөсөнцөр, жимс жимсгэнэ
    Өдөр: Хар шөл, хар талх
    Орой: Ногооны майонезгvй салат

    Бямба гариг
    Өглөө: Хар талх, нvдэлж шарсан өндөг
    Өдөр: Төмсний нухаш, нарийн ногооны салат, жимс
    Орой: Улаан лоолийн соусаар амталж ногооны салатаар хачирласан бvрмэл загас

    Ням гариг
    Өглөө: Шинэ эсвэл хатаасан жимс, йогурт, шинэхэн талх
    Өдөр: Төмсний нухаш эсвэл будаагаар хачирлан амтат ногоогоор амталж жигнэсэн тахиа
    Орой: Жимсний салат, сыр

    Анхаар!
    Талхаа та бvхэн боломжийн хэрээр өөр өөр төрлийг сонгож хэрэглээрэй. Жишээлбэл: франц талх, тvрк талх, орос талх, хар талх, цагаан талх гэх мэтчилэн. Эдгээр талхыг томоохон супермаркетуудаас аваарай. Мөн ногооны майонезгvй салатны хувьд та бvхэн салатаа оливын тос болон хар, цагаан цуугаар амтлах хэрэгтэй юм шvv. Бид байнга загас, шувууны мах хэрэглээд байж чаддаггvй тул өөхгvй хар мах, татсан хар мах бvхий ногоотой шөл, цутан шөл хэрэглэж болно. Гол нь тослоггvй бас хэт хуурч хайрсан байж л болохгvй. Хоолоо болгохын тулд жигнэхэд л хангалттай.

    Эх сурвалж:
    www.huurhun.mn

  • Т. Санаа 2012-05-16 10:05

    уулан иx сайxан зөвөлгөөнүүд байна даан ч над мэтийн тэвчээр муутай xоолны өвчтэй xүнд үнxээр xэцүү юмаа




Krilleer On/Off (Ctrl+Alt)   Хөрвүүл   Тохиргоо   © 2008 Adiya Bold