Х.Баттулга Ерөнхий сайд болвол...

Удахгүй усан луу (монголчуудынхаар, азийн бусад орнуудад бол орчихсон) жил орж монголчуудын 4 жилдээ нэг явагддаг төр засгийг сонгох сонгуулийн хугацаа ойртож байна. 4 жил гэдэг хийсэн юм ихтэй хүнд харвасан сум шиг хурдан өнгөрдөг бол МАНАН-ын Засгийн газрын гишүүдэд хичнээн урт бөгөөд удаан жилүүд байсан болдоо хөөрхийс. Тэгтэл саяхан АН нь унаж яваад морио, ханилж яваад ханиа гэдэг шиг хударгагүй зан гаргаж мөрөө буруулав. АН-ын дарга Н.Алтанхуяг хамтарсан Засгийн газраас гарах мэдэгдэлдээ: Бид хамтарсан Засгийн газарт орсон үүргээ хангалттай сайн гүйцэтгэсэн учир УИХ-ын сонгуульд ард иргэдэд ойлгомжтой байдлаар орохын тулд Засгийн газраас гарах нь зөв гэж би намын даргын хувьд үзэж байгаа юм... Монголчууд ажил хийвэл дуустал, давс хийвэл уустал гэдэг биш билүү. Энэ хаврын чуулганаар хийх ажил, шийдэх асуудал зөндөө байгаа. Харин энэ хугацаанд Н.Алтанхуягаар даргалуулсан АН хүчтэй сөрөг хүчний үүргээ нэр төртэй биелүүлэх гэж байгаа юм байх. Өнгөрсөн 3 жил хагасын хугацаанд өвөр түрийдээ орчихоод сонгуулийн өмнө гэнэтхэн ухаан суув уу гэлтэй. Тийм л хангалттай биелүүлж байсан юм бол сүүлийн хэдэн сардаа улам л бататгаад явмаар юм. Миний хувьд ийм хүмүүст итгэж боломгүй л санагддаг. Ерөнхий сайд нь ч гэж хөөрхий харамслаа илэрхийлж матрын нулимс унагаад л. Тэрний оронд баярлалаа баяртай гээд зоригтой хэлчихсэн бол илүү нэр төртэй харагдах байлаа. Н.Алтанхуяг хувь хүнийхээ талаас бол гүндүүгүй сайхан л Монгол эр хүн байна лээ. Харин улс төрчийн хувьд том намыг авч явах зиндааны хүн яавч бишээ. Хэрвээ АН энэ оны сонгуульд Н.Алтанхуяг даргатайгаа орвол годройтож л таараа. Зөвхөн миний таамаглаж байгаагаар энэ жилийн сонгуулиар энэ байдлаараа АН, МАН хоёр аль аль нь олонхи болж 39 ба түүнээс дээш суудал авч чадахгүй л болов уу. Харин шинээр байгуулагдсан МАХН, мөн ИЗНН зэрэг жижиг намууд нийлээд арав хол давсан суудал авчих байх. Тиймээс АН Х.Баттулгыг даргаа болгоод сонгуульд оролцвол ялах магадлал 99 хувьтай харагдаж байна. Х.Баттулгаар удирдуулсан АН сонгуульд ялбал дараагийн Ерөнхий сайд Х.Баттулга болох нь ойлгомжтой. Х.Баттулга Ерөнхий сайд болвол би хувьдаа зуун хувь дэмжинэ. Үнэндээ бол МАНАН-ын Засгийн газрын газрын сайдуудаас хамгийн сайн ажилласан нь тэр л байсан. Өшөө сайн ажиллах ч боломж түүнд байсан. Харин санхүүгийн асуудлыг нь шийдэж өгөөгүйгээс маш их ажил цалгардсныг тэр хэд хэдэн удаа дурдаж байсан. Зарим нэг нь Баттулга гэхээр өстэй юм шиг 17 чингэлэг спирт гэж ирээд л эсэргүүцдэг юм байна лээ. Алддаггүй хүн гэж хаа байхав дээ. Харин алдаагаа ухамсарласан хүн л зөв хүн байдаг. Түүнээс би огт алдаж байгаагүй, энхийн цагаан тагтаа гэж ирээд донгодож байгаа хүмүүс худлаа л байдаг байхгүй юу. Гэхдээ энд нэг аюул харагдаж байгаа нь хэрвээ Н.Алтанхуяг намын даргын суудлаа өгөхгүй гүрийвэл дургүйлхсэн Х.Баттулга шинэ нам байгуулж өрх тусгаарлах магадлалтай. Тэгвэл АН хамраараа газар шаасантай адил юм болох вий дээ. Хүмүүс намайг АН-ын гишүүн намаа сурталчлаад байна гэж ойлгов. Үнэндээ би АН, МАН алинг ч дэмждэггүй хүн. Бодлогын хувьд ИЗНН-ыг арай илүү дэмждэг гэхүү дээ. Гэхдээ Монгол улсынхаа сайхан ирээдүй, хөгжлийн төлөө аль нэгийг нь сонгохоос өөр аргагүй болчихоод байгаа юм. Яагаад гэхээр бусад жижиг намууд яаж ч хичээгээд УИХ-д олонх болж чадахгүй. Тийм учраас надад энэ хоёр намын аль нэгийг сонгохоос өөр алга. МАН-ын төлөө бол яадаг ч байсан саналаа өгөхгүй. Тэд тараа хангалттай таниулсан. Харин Х.Баттулгаар удирдуулсан АН-д бол өгч болж байнаа. Тэр сайн Ерөнхий сайд болж чадна. За тэгээд эрхэм сонгогчид та бүгдийн мэргэн оюун тунгаах буйзаа.