2 чөлөөт сэдэв

  Чөлөөт сэдэв , E. Nomuundari 2009-11-25 13:26 нэмсэн. 0 хариулттай

тусгаар тогтнол

Хятадын хилийн хотод хятад хэл сурдаг 10-аад насны монгол жаал хөвгүүд нэгэн жижигхэн монгол цайны газарт Халуун элгэн нутаг дууг чин сэтгэлээсээ дуулан суугаатай тааралдаж билээ. Эх нутаг эцэг эхээ санасан тэдний сэтгэлийн гуниг нүдэнд нь нулимс болон хуравч хүүхдүүдийн хэн нь ч нулимс дуслуулсангүй. Аргагүй л цөс ихтэй монгол хөвгүүд юм даа. Хүний нутагт дөнгөж 6, 7 настайдаа ирсэн жаалууд ганзагын наймаачин болоод ажил хэрэгч ах эгч нараасаа илүү тусгаар тогтносон монгол улсын иргэнээрээ бахархана. Жаахан биендээ баймгүй ухаан сууж хэрсүүжсэн тэд өвөг дээдсийн минь цусаа урсган тэмцэж хамгаалж ирсэн газар нутаг хумигдаж, халуун амиа зориулсан тусгаар тогтнол маань ганхах бий хэмээн ярилцаж байсан юм. Гэдэс өлсөхгүй л бол тоглоомноос өөрийг нэг их бодож тунгаадаггүй байсан миний хүүхэд наснаас тэд нарынх огт өөр билээ. Өглөөний 6 цагт босож үдэш 10 цагт дэнгийн гэрэл унтрахад л хуарангийн цэргүүд шиг орондоо ордог тэдэнд үргэлж дэргэд нь байх өвөрлөгч багш нар нь алдвал ахиж олоход амаргүй тусгаар тогтнол хэмээх нандин зүйлийн тухай гашуун сургамжийг сэтгэл зүрхэнд нь шингээж өгсөн гэлтэй. Ирээдүйг хэн ч таахгүй гэхдээ бидний үргэлжлэл болсон үр хүүхдүүдийн маань гарт ирээдүй бий гэдэгтэй хэн ч маргахгүй биз ээ. Хээрийн галуу нисэн үл хүрэх газраас хүний хүү эрдэнэ өвөртлөн ирнээ гэж ... Хил манах хөвгүүд маань хүний нутагт эх орноо санагалзан өсөж байна. Сэтгэлдээ тээх эх оронтой, голомт залгах хүүтэй туурга тусгаар Монгол улсын иргэн та бид нар азтай хийморьтой ард түмэн шүү.

Хариулт

Хариулт Бичих