Өнгөрөгч долоо хоногийн бямба гарагт Аргентины хөл бөмбөгийн домог Лионель Месси Америкийн Интер Майами клубтэй гэрээ байгуулсан тухай мэдээ олон улсын хэвлэл мэдээллийн хэрэгслүүдээр түгсэн билээ. Жилийн 50-60 сая ам.долларын үнэлгээтэй гэгдэж буй тус гэрээний хувьд 2 жилийн хугацаатай юм.

Үйл явдлын хүрээнд хэвлэлүүдийн мэдээлснээр Интер Майами клубийн шинэ довтлогч энэ долоо хоногийн баасан гарагт анхны тоглолтоо хийнэ гэж байсан. Тэгвэл хэвлэлүүдийн ийн мэдээлэхтэй зэрэгтэй тухайн өдрийн Интер Майами:Круз Азуль клубүүдийн хоорондох тоглолтын тасалбар 110,000 ам.долларын үнэ хүрэх болжээ. Энэ тухай мэдээллийг CNN суваг тасалбар дамлан борлуулдаг Vivid Seats веб хуудаснаас авсан байна.

Хэдий тасалбар дамлан зарах явцад тийм өндөр үнэд хүрч байгаа ч суудлын байршлаас хамаарсан илүү хямд сонголтууд ч байгаа гэнэ. Улмаар нэг тасалбарын үнэ дунджаар 487 ам.доллар гэж байгаа бол зарим фанатууд шүтээнийхээ тоглолтыг үзэхээр 700 орчим милийг ч туулах тохиолдол гарч байгаа ажээ.

Эх сурвалж: CNN