БНАСАУ “Ковид-19” цар тахал дэгдэж хорио цээрийн дэглэмийг хэрэгжүүлж эхэлснээс хойш буюу 3 жил 6 сарын дараа анх удаа ОХУ-ын Владивосток хот руу зорчигч тээврийн онгоц илгээлээ.
Риановости агентлагийн мэдээлснээр, Пхеньянаас хөөрсөн Умард Солонгосын иргэний агаарын тээврийн компанийн зорчигч тээврийн онгоц өнөөдөр 11:14 цагийн орчимд ОХУ-ын Алс Дорнодын Владивосток хотын олон улсын нисэх онгоцны буудалд газардсан тухай онцолжээ.
Өмнө нь Оросын Интерфакс агентлаг ч Умард Солонгосын иргэний агаарын тээврийн компанийн зорчигч тээврийн онгоц өнөөдөр болон ирэх 28-ны өдөр Владивосток хот руу хоёр удаагийн нислэг үйлдэхээр болсон тухай мэдээлж байсан билээ.
Умард Солонгосын иргэний агаарын тээврийн компанийн Пхеньян-Владивосток чиглэлийн нислэг нь цар тахал дэгдэхээс өмнө тус хоёр улсыг холбосон цорын ганц нислэг байсан бөгөөд долоо хоногт хоёр удаа нислэг үйлддэг байсан юм. Гэвч Умард Солонгос 2020 оны хоёрдугаар сараас хойш хорио цээрийн дэглэм тогтоосон гэх шалтгаанаар нислэгээ зогсоож байсан билээ.
Эх сурвалж: YTN