Хятад, Саудын Араб улсууд ойролцоогоор 7 тэрбум ам.доллароор хэмжигдэх валют солилцох своп гэрээг үзэглэжээ.
Синьхуа агентлагийн 11-ний өдөр мэдээлснээр, Хятадын Ардын банк саяхан Төрийн зөвлөлийн зөвшөөрлөөр Саудын Арабын Төв банктай 50 тэрбум юань солилцох своп гэрээ байгуулсан талаар онцлов.
Своп гэрээ гэдэг нь өөрийн орны мөнгөн тэмдэгтийг өөр улсын мөнгөн тэмдэгтээр урьдчилан тохиролцсон ханшаар солих гүйлгээг хэлж буй юм. Энэхүү гэрээний хүрээнд Хятад улс 50 тэрбум юань, Саудын Араб ч үүнтэй дүйх хэмжээний буюу 26 тэрбум риалыг солилцохоор тохиролцжээ. Уг гэрээ нь гурван жилийн хугацаанд хэрэгжих бөгөөд хоёр улсын тохиролцоогоор хугацааг сунгах боломжтой аж.
"Хятад, Саудын Арабын хооронд байгуулсан мөнгөн тэмдэгт солилцох гэрээ нь хоёр орны санхүүгийн хамтын ажиллагааг бэхжүүлээд зогсохгүй үндэсний мөнгөн тэмдэгтийн хэрэглээг харилцан өргөжүүлж, худалдаа, хөрөнгө оруулалтыг хөнгөвчлөхөд ихээхэн тус дөхөм болно" гэж Хятадын Ардын банк мэдэгдэв.
Өнгөрсөн оны байдлаар хоёр орны худалдааны хэмжээ 100 тэрбум ам.долларыг давж, Хятад улс Саудын Арабын хамгийн том худалдааны түнш болсон гэж Хятадын хэвлэл мэдээллийн хэрэгслүүд мэдээлж байсан билээ. Хятад улс сүүлийн үед“Бүс ба Зам” санаачлагад хамрагдаж буй улс орнуудыг чиглэсэн юанийн хэрэглээний хамрах хүрээг тэлэх бодлого баримтлах болсон нь “ам.долларын ноёрхол”-ыг сулруулах гэж буй оролдлого гэдэг нь гарцаагүй.
Тухайлбал энэ оны 9-р сарын сүүлчээр Хятад улс "Бүс ба зам" санаачилгад оролцогч 30 улстай валют солилцох гэрээг байгуулснаас гадна 17 улстай юанийн төлбөрийн системийг ашиглаж эхэлжээ.
Эх сурвалж: Asiae
Амжилт бүтээлийн дээдийг хүсиы