Өдгөө дуучин Мадонна урлагийн салбарт хүчин зүтгэсний 40 жилийн ойн аялан тоглолтоо хийж, шүтэн бишрэгчдээ баярлуулж буй билээ. Гэвч түүний бүх шүтэн бишрэгчид баяртай байна уу гэвэл үгүй ажээ.

Тодруулбал, 65 настай дуучин маань өнгөрөгч арванхоёрдугаар сарын 13-ы өдөр Брүүклин хотод хийсэн тоглолтдоо 2 цаг 15 минут хоцорсноор түүний тоглолтыг үзсэн 2 хүн шүүхэд түүний эсрэг гомдол гаргасан байна. Тоглолтын хувьд 20:30 минутад эхлэх товтой байсан ч 22:45 минут хүртэл эхлээгүй юм. Улмаар тоглолт цагтаа эхлээгүйгээс болж үзэгчид хайртай дуучныхаа дуулахыг үзэхээр шөнийн 01:00 цаг хүртэл саатжээ.

Үүнээс үүдэн нийтийн тээврээр зорчих байсан үзэгчдэд унаа тэрэгний асуудал үүссэн бөгөөд нийтийн тээвэр явахгүй цагт тоглолт дууссан учир илүү үнэ төлж харих шаардлагатай болсон гэх үндэслэлээр гомдол гаргасан байна. Мөн гомдол гаргасан хүмүүсийн хэлснээр тоглолт лхагва гарагт байсан тул тэд өглөө эрт сэрж, ажил төрлөө зохицуулчихаад тоглолтоо үзэхээр явсан ч дуучны хариуцлагагүй байдлаас үүдэн маргаашийн ажил төрлийг ч цалгардуулж болзошгүй нөхцөл үүссэн гэжээ.

Одоогийн байдлаар бидэнд байгаа мэдээлэл нь энэ тул бид энэ талаар цаашид үргэлжлүүлэн мэдээлэх болно.

Эх сурвалж: UNILAD