Netflix-ийн үүсгэн байгуулагч, ТУЗ-ийн дарга Рид Хастингс өөрийн эзэмшлийн 2 сая ширхэг хувьцааг “Silicon Valley Community Foundation” буяны байгууллагат хандивлажээ. Тэгвэл Netflix компанийн 2 сая ширхэг хувьцаа нь зах зээлийн үнэлгээгээрээ 1.1 тэрбум ам.доллароор үнэлэгдэж буй юм.
CNBC агентлаг Хастингсийн өнгөрөгч 24-ний өдөр АНУ-ын Үнэт цаас, биржийн хороонд ирүүлсэналбан бичгээс иш татан орон нутгийн цагаар 29-ний өдөр мэдээлснээр 2 сая ширхэг хувьцааг нэр нь тодорхойгүй хуулийн этгээдэд хандивласан тухай онцлов. Эзэмшигч өөрчлөгдөж буй талаарх мэдэгдэл дээрх гүйлгээний утга хэсэгт "сайн санааны бэлэг" гэх утга бүхий “G” тэмдэглэгээг бичсэн байжээ. Эдгээр хувьцааг хүлээн авч буй хуулийн этгээд хэн болох нь тодорхой бус байгаа ч Variety сэтгүүл энэ талаар сайн мэддэг эх сурвалжаас иш татан "Энэ нь Silicon Valley Community Foundation гэх буяны байгууллага" гэж мэдээлсэн байна. Энэхүү сан нь бүс нутгийн баян хоосны ялгааг бууруулах зорилготойгоор үйл ажиллагаа явуулдаг аж.
1997 онд Марк Рандолфтой хамтран видео түрээсийн үйлчилгээ үзүүлэгч Netflix компанийг үүсгэн байгуулж байсан Хастингс нь компаниа стриминг үйлчилгээний салбартаа дэлхийд тэргүүлэгч болгон өргөжүүлж чадсан юм.
Эх сурвалж: Hankyung