Дэлхийн эрүүл мэндийн байгууллагын (ДЭМБ) зүгээс 2050 он гэхэд дэлхий даяар хорт хавдраар өвчлөгсдийн тоо 77 хувиар нэмэгдэнэ гэж таамаглажээ.

ДЭМБ орон нутгийн цагаар 1-ний өдөр нийтэлсэн мэдэгдэлдээ, тус байгууллагын дэргэдэх Хавдар судлалын олон улсын агентлаг 2050 он гэхэд жилд 35 сая гаруй хорт хавдрын шинэ тохиолдол бүртгэгдэх болно хэмээн цохон тэмдэглэсэн байна.

Энэ нь 2022 онд 20 сая гаруй хорт хавдрын шинэ тохиолдол бүртгэгдэж байсантай харьцуулахад 77 хувиар өссөн үзүүлэлт юм.

Тамхи татах, согтууруулах ундаа хэрэглэх, таргалалт, агаарын бохирдол зэрэг хорт хавдрын эрсдэлт хүчин зүйлд илүү олон хүн өртөж байгаатай холбоотой гэж ДЭМБ тайлбарлав.

Ялангуяа хөгжингүй орнуудад хорт хавдрын шинэ тохиолдол улам нэмэгдэх төлөвтэй байгаа гэжээ. Тодруулбал хөгжингүй орнуудад бүртгэгдэх тохиолдол 2022 онтой харьцуулахад 4.8 саяар өснө хэмээн дүгнэсэн байна.

Эх сурвалж: YTN