Газын зурваст гал зогсоох тухай саналд хариу өгсөн гэдгээ ХАМАС бүлэглэлийнхэн мэдэгджээ.

Израил, АНУ, Катар, Египетийн төлөөлөгчид Парист уулзах үеэр дэвшүүлсэн уг саналд тусгасан нарийн ширийн заалтуудыг олон нийтэд хараахан дэлгээгүй байна. Энэ саналд барьцаанд байгаа израилчуудыг палестин хоригдлуудаар солилцож, зургаан долоо хоногийн хугацаатай эвлэрэх гэрээ байгуулах асуудлыг багтаана гэж хэвлэлүүд өмнө нь мэдээлж байв.

Израил, АНУ-ын аль аль нь ХАМАС-ын өгсөн хариуг хянан нягталж байна гэдгээ мэдэгдсэн байна. Ойрхи Дорнодод хүрэлцэн очоод буй АНУ-ын Төрийн нарийн бичгийн дарга Энтони Блинкен ХАМАС бүлэглэлийнхний өгсөн хариуг Израилын эрх баригчдын хамт лхагва гарагт хэлэлцэнэ гэж мэдэгджээ.

Америкийн эрх баригчид уг хариуг хэрхэн үнэлж дүгнэж байгаа талаар тэрбээр тодорхой мэдээлэл өгөөгүй боловч Ерөнхийлөгч Жо Байден “бага зэрэг хэтэрсэн” гэж тодорхойлсон нь Израилын удирдлага уг бүлэглэлийнхний хүсэж буй зүйлийг тийм ч амархан хүлээн зөвшөөрөхгүй гэдгийг харуулж байна.

ХАМАС-ын өндөр албан тушаалтан ВВС телевизэд мэдэгдэхдээ, бүлэглэлийн зүгээс “нааштай” хариу өгсөн боловч Газын зурвасыг сэргээн босгох, оршин суугчдыг нь гэрт нь буцаах, мөн орон гэрээ орхихоос аргагүйд хүрсэн хүмүүст зориулсан заалттай холбоотой зарим нэмэлт өөрчлөлт оруулахыг хүссэн гэжээ.

Түүний хэлснээр, ХАМАС мөн шархадсан хүмүүсийн эмчлэхтэй холбоотой өөрчлөлт оруулахыг хүссэн бөгөөд үүнд тэднийг гэр орондоо эргэж ирэх, хилийн чанад дахь эмнэлэгт шилжүүлэх гэх мэт нөхцлүүд багтсан байна.

Саналыг долоо хоногийн өмнө ХАМАС руу илгээсэн боловч зарим заалт нь “тодорхойгүй, хоёрдмол утгатай” байсан тул хариу өгөхөд хугацаа шаардлагатай байсан гэдгийг тус бүлэглэлийн төлөөлөгч Reuters агентлагт мэдээлжээ.

Катарын Ерөнхий сайд шейх Мохаммед Бин Абдулрахман аль Тани ХАМАС-ын хариуг ерөнхийд нь “нааштай” гэж үзэж байна.

Эх сурвалж: BBC /МОНЦАМЭ агентлаг/