Өнгөрөгч ням гарагт АНУ-д Super Bowl LVIII буюу америк хөлбөмбөгийн тэмцээний финалын тоглолт зохион байгуулагдсан билээ. Улмаар тус тоглолтод Chiefs болон Niners багууд тоглож, 25:22 гэх онооны харьцаатайгаар Kansas City Chiefs баг ялсан юм.
Бидний урьд мэдээлсэн дагуу уг тоглолтын шууд дамжуулалт нь бүх цаг үеийн хамгийн их үзэлттэй шоугаар тодорсон. Тэгвэл хэвлэлийнхний мэдээлж буйгаар энэ нь дуучин Тэйлор Свифтийн нөлөө гэнэ шүү.
Учир нь дуучин Тэйлор Свифт өнгөрөгч оны сүүлээс америк хөлбөмбөгийн Kansas City Chiefs багийн тамирчин Трэвис Келситэй үерхэх болсон бөгөөд өнгөрөгч ням гарагт болсон тоглолтыг тэр найз залуугийнхаа ээж, ах болон бусад найзуудын хамтаар Трэвисийг хөгжөөн дэмжсэн юм. Улмаар хайртай дуучинтайгаа нэг цэнгэлдэхэд тоглолт үзэхийг хүссэн түүний шүтэн бишрэгчид ч Super Bowl LVIII тоглолтыг зорьжээ.
Статистик үзүүлэлтийг үзвэл, энэ онд 18-24 насны охидын Super Bowl тэмцээний финалын тоглолтыг үзэх нь өнгөрөгч оны тоглолттой харьцуулахад даруй 24 хувиар нэмэгдсэн бол 12-17 насны охидын үзэлтийн тоо 2023 оныхноос 11 хувиар илүү байсан гэнэ. Мөн үүнээс гадна 18-24 нас залуус, 12-17 насны охидын үзэлтийн тоо өнгөрөгч оны тоглолтоос 2 сая гаруй үзэгчээр илүү байжээ.
Эх сурвалж: SI