Украины ерөнхийлөгч Володимир Зеленський орон нутгийн цагаар 27-ны өдөр Саудын Арабт айлчилсан тухай Associated Press агентлаг мэдээлэв.
Ерөнхийлөгч Зеленський Саудын Арабын нийслэл Эр-Рияд хотноо угсаа залгамжлах ханхүү Мохаммед бин Салмантай уулзаж, энхийн төлөвлөгөө болон ОХУ дахь олзлогдогсдыг эх оронд нь буцаах асуудлыг хэлэлцэхээр төлөвлөж байгаа аж.
Тэрээр нийгмийн сүлжээний Х платформ дээр “Саудын Арабын удирдагч манай ард түмнийг суллахад хувь нэмрээ хэдийн оруулсан билээ. Энэ уулзалт ч үр дүнд хүрнэ гэдэгт итгэлтэй байна” хэмээн цохон тэмдэглэжээ.
Ерөнхийлөгч Зеленськийн Саудын Арабт хийж буй энэ удаагийн айлчлал Украины арми зүүн фронтоос аажмаар шахагдаж байгаа үед болж буйгаараа анхаарал татаж буйг Associated Press агентлаг дурдсан байна.
Ерөнхийлөгч Зеленський өнгөрсөн оны тавдугаар сард Саудын Арабын Жидда хотод гэнэтийн айлчлал хийн угсаа залгамжлах ханхүү бин Салмантай уулзаж, Арабын лигийн дээд хэмжээний уулзалтад үг хэлж байсан билээ.
Эх сурвалж: MBC