Украины хэвлэл мэдээллийн хэрэгслүүд орон нутгийн цагаар 14-ний өдөр Оросын арми Умард Солонгосын ойрын тусгалтай баллистик пуужингуудыг Украины эсрэг 50 орчим удаа ашигласан хэмээн мэдээлсэн байна.

Мөн өдөр Харьковын Космополитийн ерөнхий прокурор Александр Пилчаков Орос улс дайн эхэлснээс хойш "Искандерийн Умард Солонгос хувилбар" (KN-23) гэгддэг “Хвасон-11”пуужинг 50 орчим харвасан хэмээн мэдэгдсэнийг Украины New Voice of Ukraine болон Интерфакс-Украин зэрэг хэвлэл мэдээллийг агентлагууд онцлов.

Прокурор Пилчаков Оросын арми "Хвасон-11" пуужинг Харьков мужид нэг удаа хаясан гэдгийг батлахын зэрэгцээ дахин хоёр удаагийн халдлагад тус пуужинг ашигласан байж болзошгүй эсэхийг шалгаж байгаа гэдгээ мэдэгдсэн байна.

Үүнээс гадна өнгөрсөн сарын 7-нд Харьковын Слободский дүүрэгт унасан пуужингийн хаягдал дээр “Хвасон-11” пуужинг үйлдвэрлэдэг Умард Солонгосын батлан хамгаалах салбарын үйлдвэрийн нэр бичигдсэн байсан болохыг цохон тэмдэглэв.

Украины тал “Хвасон-11” пуужинг дээд тал нь 700 километрийн тусгалтай, чиглүүлэх систем муутай пуужин гэж тодорхойлсон бөгөөд уг пуужин нь байндаа тусахаас өмнө буюу агаарт дэлбэрсэн тохиолдол олон бүртгэгдсэн гэжээ.

Цагаан ордны Үндэсний аюулгүй байдлын зөвлөлийн стратегийн харилцаа холбооны зохицуулагч Жон Кирби энэ оны нэгдүгээр сарын эхээр Умард Солонгосын нийлүүлсэн баллистик пуужингаар Оросын тал Украин руу довтолж байна гэж мэдэгдэж байсан билээ.

Эх сурвалж: JoongAng