Спорт бараа үйлдвэрлэгч Adidas, Nike компаниудын хооронд үүсээд буй маргааныг шийдвэрлэх давж заалдах шатны шүүх хурал Германд эхэлсэн тухай Zeit сонинд мэдээлжээ.
Маргаан үүсэх болсон шалтгаан нь Adidas компанийн худалдааны тэмдэг болох гурван зэрэгцээ зураас юм. 2022 онд Nike компани хоёр, гурван зураастай хэд хэдэн өмд гаргасан нь зохиогчийн эрхийг зөрчсөн гэж үзэн Adidas компани Америкийн брэндийг шүүхэд өгчээ. Мөн оны есдүгээр сард Дюссельдорф хот дахь мужийн шүүх Nike брэндийн өмдний таван загварыг Германд худалдахыг хориглох шийдвэр гаргасан байна.
Америкийн компани давж заалдах гомдол гаргасан боловч 2023 оны есдүгээр сард шүүх шийдвэрээ хэвээр үлдээсэн тул Nike дахин давж заалдсан байна. Одоо шүүх шийдвэрээ дахин гаргах ёстой. Зураастай загвар бол "маш түгээмэл, энгийн" байдаг тул Adidas компанийн зураастай холбоотой гаргаж тавьсан баримтууд нь хэт нэг талыг барьсан гэж Nike компани үзэж байгаа ажээ. Түүнчлэн бусад үйлдвэрлэгчид хажуу талдаа судалтай өмд үйлдвэрлэдэг болохыг дурджээ. Ийм учраас зураас ашигласан загварууд нь тухайн бүтээгдэхүүн тодорхой нэг брэндэд хамаарч буйг илтгэхгүй гэж үзэж байгаа аж.
Эх сурвалж: ТАСС /МОНЦАМЭ агентлаг/