ОХУ-ын ерөнхийлөгч В.Путины Үндэсний аюулгүй байдлын зөвлөлийн дэд дарга Дмитрий Медведев “Хэрэв Украины сөрөх довтолгоо амжилттай болвол Орос цөмийн зэвсэг хэрэглэхээс өөр аргагүй болно” хэмээн анхааруулсан байна.
Хонконгийн South China Morning Post сонины орон нутгийн цагаар 30-ны өдөр мэдээлснээр, Медведев мөн өдөр Телеграм платформоор дамжуулан “Хэрэв НАТО-гийн дэмжлэгтэй сөрөх довтолгоо амжилттай болж, манай газар нутгийн зарим хэсэгт халдсан тохиолдолд ерөнхийлөгч Путины тушаалаар бид цөмийн зэвсэг хэрэглэхээс өөр замгүй. Бидэнд өөр сонголт байхгүй” хэмээн цохон тэмдэглэжээ.
Тэрээр үргэлжлүүлэн “Улаан арми (Украин) Оросын дайчдын амжилтын төлөө залбирах ёстой. Тэд дэлхийд цөмийн гал авалзахаас сэргийлж, ихэд хичээж байна” хэмээн тэрээр онцлов.
Өнгөрсөн оны хоёрдугаар сард ОХУ Украинд халдан түрэмгийлснээс хойш Медведев барууны орнууд болон Украины эсрэг маш хатуу үгсийг “чулуудсаар” ирсэн билээ.
Тухайлбал “Хэрэв Крымийн хойгийг эзлэн түрэмгийлвэл бүх дэлхийн төгсгөл буюу “Мөхлийн өдөр (цөмийн дайн)" ирэх болно” гэх зэргээр дайн дэгдэхээс өмнө бодохоос ч эмээдэг байсан цөмийн аюул заналхийллийн талаар ярихаасаа огтхон ч эмээгээгүй юм.
Эх сурвалж: Newsis