Богино хэр нь үзүүштэй бичлэгүүдийн нэгдсэн платформ болох TikTok-ийн хэрэглэгчдийн тоо өдгөө 1.1 тэрбумыг даваад байгаа билээ. Нэг бичлэг эхлүүлэхэд таваас арван минут заавал хороож таардаг энэхүү платформын АНУ дахь хэрэглэгчдийн насны статистикийг сонирхвол 5-24 насныхан нийт хэрэглэгчдийн 51.6 хувийг бүрдүүлдэг.
Тэгвэл саяхан АНУ-ын Хойд Кэролина муж дахь нэгэн дунд сургуулийн сурагчдын хүрээнд уг платформд донтох хандлага илт нэмэгдсэнээр сургуулийн захиргаа ариун цэврийн өрөөнүүдийнхээ толийг буулгах шийдвэрийг гаргажээ.
Ийн шийдвэрлэх болсон шалтгаан нь тус сургуулийн сурагчид TikTok бичлэг хийхийн тулд ариун цэврийн өрөө ашиглахаар шалтаглан хичээлээ тасалдуулж, зарим сурагчид өдөрт дор хаяж 9 удаа ариун цэврийн өрөө ашиглаж, зарим нь хичээлээ бүрмөсөн тасалж, ариун цэврийн өрөөний толийг ашигласан янз бүрийн бичлэг хийх болсон байна. Тийнхүү сургуулийн захирлын хэлснээр толинуудыг буулгасны дараагаар сурагчдын ариун цэврийн өрөө ашиглах хугацаа илт богиносож, өдөрт ариун цэврийн өрөө ашиглах тоо нь ч буурсан гэжээ.
Эх сурвалж: UNILAD