Европын холбооны зүгээс ОХУ-д пуужингаар дэмжлэг үзүүлсэн Умард Солонгосын эсрэг хориг арга хэмжээ авахаар хэлэлцэж байгаа талаар Bloomberg News агентлаг орон нутгийн цагаар 14-ний өдөр мэдээлэв.
Тус мэдээнд дурдсанаар Европын холбоо “Украины эсрэг хийж буй довтолгоондоо Оросын арми Умард Солонгосын зохион бүтээж, хөгжүүлж, үйлдвэрлэсэн баллистик пуужинг ашигласан" хэмээн онцлон тэмдэглэсэн байна. Улмаар БНАСАУ-ын Батлан хамгаалахын сайд болон Умард Солонгосын пуужингийн удирдах газрыг хориг арга хэмжээний жагсаалтад оруулах төлөвлөгөөтэй байгаа талаар мэдэгджээ.
Европын холбооны тухайд хүний эрхийг зөрчсөн, НҮБ-ын Аюулгүйн Зөвлөлийн тогтоолыг зөрчсөн зэрэг хэргээр Умард Солонгосын өндөр албан тушаалтнуудын эсрэг хориг арга хэмжээ авч байсан билээ. Гэвч Украины дайнтай холбогдуулан тус улсын эсрэг хориг арга хэмжээ авах талаар анх удаа яригдаж байгаа нь энэ юм.
Украины дайны хоёр жилийн ой тохиож буй энэ сарын 24-ний өдөр Европын холбоо ОХУ-ын эсрэг авч хэрэгжүүлэх 13 дахь багц хориг арга хэмжээгээ албан ёсоор зарлахаар хэлэлцэж байгаа билээ. Тэгвэл энэ удаагийн хориг арга хэмжээнд Умард Солонгосын эсрэг шинэ хориг арга хэмжээ багтах магадлал өндөр байна.
Эх сурвалж: YTN