Өнгөрөгч баасан гарагт Их Британийн үндэсний агаарын тээвэрлэгч Бритиш Эйрвэйс компанийн дэргэдэх үйлдвэрчний эвлэлээс мэдээлснээр тус авиакомпани 24,000 орчим ажилтныхаа цалинг 13 гаруй хувиар нэмэхээр шийдвэрлэжээ.

Үүнээс гадна тэд ажилтнууддаа нэг удаа 1,000 фунт стерлингийн урамшуулал олгохоор шийдвэрлэсэн ч эвлэлээс мэдээлж байгаагаар энэхүү урамшуулалд нисгэгчид хийгээд удирдах албан тушаалтнууд багтахгүй гэнэ.

BBC сувгаас мэдээлснээр Бритиш Эйрвэйс компани ажилтнуудынхаа цалинг тийн нэмснээр нислэг саатах эрсдэлийг бууруулж байна гэсэн юм. Учир нь авиакомпанийн ажилтнууд инфляцаас үүдэн цалингаа нэмүүлэх шаардлага тавьж, талууд олон сарын турш хэлэлцээр хийсэн билээ.

Их Британи улсын инфляцын хувьд 7.9 хувьтай байгаа бөгөөд энэ нь Английн Төв банкны зорилтот түвшнээс даруй 5.9 хувиар өндөр байгаа юм. Тиймээс ч үйлдвэрчний эвлэлээс ажилтнуудад ирэх инфляцын дарамтыг бууруулахаар цалинг нэмэх шаардлага тавьсан нь тийн үр дүнд хүрчээ.

Эх сурвалж: BBC