Израиль улс болон Палестины зэвсэгт Хамас бүлэглэл түр гал зогсоох шийдвэр гаргаад буй энэ үед Израилийн Ерөнхий сайд Биньямин Нетаньяху "Бид Хамас бүлэглэлийг устгах дайны зорилгоо үргэлжлүүлэн хэрэгжүүлэх болно" гэж мэдэгдэв.

Ерөнхий сайд Нетаньяху орон нутгийн цагаар 23-ны өдөр Израильд айлчилж байгаа Их Британийн Гадаад хэргийн сайд Дэвид Камеронтой уулзахдаа энэ тухай мэдэгдсэн болохыг Ройтерс агентлаг мэдээллээ.

Ерөнхий сайд Нетаньяху хэлэхдээ, "Ийнхүү мэдэгдэж буйн шалтгаан бол Хамас бүлэглэл дайныг үргэлжлүүлж, барьцаалах гэмт хэрэг дахин үйлдэх болно гэж удаа дараа мэдэгдсэнтэй холбоотой” хэмээн цохон тэмдэглэв.

Тэрээр үргэлжлүүлэн “Бид бүгдийн ирээдүйд заналхийлж буй Хамас бүлэглэлийн харгис хэрцгий үйлдлүүдийг бүрмөсөн таслан зогсоохгүй бол Израиль болон Палестин, Израиль болон Арабын орнууд хоорондоо энх тайванчаар оршин тогтнох найдвар байхгүй" гэж онцолжээ.

Их Британийн ерөнхий сайдын албыг хашиж байсан Дэвид Камерон өнгөрөгч 13-ны өдөр буюу долоон жилийн дараа Гадаад хэргийн сайдын үүрэгт ажлыг хүлээн аван Засгийн газрын танхимд буцаж ирээд байгаа билээ. Тэгвэл тэрээр Израиль, Палестин улсуудад айлчилж, хоёр орны удирдагчидтай уулзаж байгаа юм.

Сайд Камерон ерөнхий сайд Нетаньяхуд хандан “Та бүхний амссан аймшигт халдлагын бодит байдлыг өөрийн нүдээр харахыг хүссэн бөгөөд бид Израилийн ард түмэнтэй хамт байна. Одоо хүмүүнлэгийн гал зогсоох тухай ярих нь барьцаалагдсан хүмүүсийг аврах, Газын зурваст амьдарч буй хүмүүст тусламж үзүүлэх чухал боломж юм” хэмээн сэтгэгдлээ илэрхийлсэн байна.

Энэ өдөр ерөнхий сайд Нетаньяхутай уулзахын өмнө тэрээр сум нэвтэрдэггүй хантааз өмсөж, Израилийн Гадаад хэргийн сайд Эли Коэнтэй хамт Израилийн өмнөд хэсэгт орших Беери Киббутц дахь халдлагад өртсөн барилга байгууламжуудыг өөрийн биеэр очин харжээ. Тэрээр энэ үеэр сэтгүүлчдэд “Би хэзээ ч мартагдахааргүй зүйлсийг харж, сонссон” хэмээн хэлсэн юм.

Түүний энэ удаагийн айлчлал Израиль болон Хамас бүлэглэлийн хооронд түр гал зогсоож, барьцаалагдсан хүмүүсийг суллах ажил ид яригдаж байгаа энэ үед болсон юм.

Хоёр улсын хэлэлцээнд зуучлагчаар оролцсон Катарын засгийн газар 24-ний өглөөний 07:00 цагаас гал зогсооно гэж мэдэгдээд байгаа билээ.

Эх сурвалж: JoongAng